Նախագծի ընդունումը հրատապ է․ Ջուլհակյանը՝ Ընտրական օրենսգրքում նախատեսվող փոփոխությունների մասին․ ՏԵՍԱՆՅՈՒԹ

Ազգային ժողովում քննարկվում է Ընտրական օրենսգիրք սահմանադրական օրենքում փոփոխություններ և լրացումներ կատարելու մասին նախագիծը, որը հեղինակել են պատգամավորներ Արուսյակ Ջուլհակյանը, Վլադիմիր Վարդանյանը և Լիլիթ Մինասյանը։

Փոփոխությունը վերաբերում է դիտորդական առաքելություններին։

«Դիտորդական առաքելություններն ընտրական գործընթացում ներգրավվում են որպես հանրային վերահսկողություն իրականացնող սուբյեկտներ, որոնց հիմնական առաքելությունն է ընտրական գործընթացի անկախ, օբյեկտիվ և անաչառ գնահատումը:

Այդ նպատակի իրագործումը հնարավոր է միայն այն պայմաններում, երբ դիտորդական առաքելությունները և դիտորդները գործում են քաղաքականապես չեզոք և անաչառ: Հայաստանի Հանրապետության գործող Ընտրական օրենսգիրքը չի սահմանում բավարար և արդյունավետ իրավական մեխանիզմներ դիտորդական առաքելությունների և դիտորդների կողմից քաղաքական չեզոքության և անկողմնակալության պարտականության պատշաճ կատարման վերահսկումը և ապահովումը երաշխավորելու համար»,-նշեց Ջուլհակյանը:

Պատգամավորի խոսքով՝ ներկայացված օրենսդրական նախաձեռնությունը միտված է նշված բացի շտկմանը, ընտրական գործընթացների նկատմամբ չեզոքության, թափանցիկության և իրավական կանխատեսելիության ամրապնդմանը:

«Նախագծի ընդունումը հրատապ է, հաշվի առնելով այն հանգամանքը, որ առաջիկայում արդեն մեզ սպասվում են ընտրական գործընթացներ, և դրանց նկատմամբ հանրային և միջազգային ուշադրության բարձր մակարդակ է առկա, և դրանով պայմանավորված, հարգելի գործընկերներ, այսօր մենք այստեղ հավաքվել ենք և նպատակահարմար ենք համարել այս նախագիծը հրատապ քննարկել»,- նշեց նա։

Մանրամասները՝ տեսանյութում։