Ռուսաստանը կարող է կորցնել Սիրիայում իր երեք ռազմաբազաներից մեկը

Սիրիայի կառավարությունը կարող է խնդրել ռուսական զորքերին լքել իրենց երեք բազաներից մեկը՝ երկրի հյուսիսում գտնվող Ղամիշլիի օդանավակայանը։ Ըստ սիրիական աղբյուրի՝ այս հարցի շուրջ բանակցությունները կարող են սկսվել այն բանից հետո, երբ Հասակե նահանգի (որտեղ գտնվում է Ղամիշլին) վերահսկողությունը քրդական ուժերից փոխանցվի կառավարությանը, գրում է Meduza-ն։

«Կարծում եմ՝ ռուսներին կխնդրեն ամբողջությամբ լքել Ղամիշլին։ Նրանք այժմ այնտեղ գործ չունեն»,- Կոմերսանտին ասել է աղբյուրը՝ առանց մանրամասների։

Ռուսաստանի միջազգային հարաբերությունների խորհրդի փորձագետ Անտոն Մարդասովը նույնպես կանխատեսում է ռուսական զորքերի դուրսբերում Ղամիշլիից: Տարածաշրջանային մրցակցության սրման և Սիրիայի կառավարության կողմից քրդական ուժերի վրա ճնշման ֆոնին, նա կարծում է, որ «Մոսկվան, հավանաբար, չի կարողանա միջնորդի դեր խաղալ»:

«Հետևաբար, տրամաբանական է, որ ռուսական զորքերի ներկայությունն այնտեղ կկրճատվի»,- հայտարարել է Մարդասովը։

Ռուսաստանը սկսել է օգտագործել Ղամիշլիի օդանավակայանը 2019 թվականին։ Ռուսական զորքերը մնացել են այնտեղ Սիրիայում իշխանափոխությունից հետո և, ըստ սիրիական լրատվամիջոցների, նույնիսկ ավելացրել են թվաքանակը 2025 թվականի ամռանը։ Սակայն հունվարին Syria TV-ն, հղում անելով արբանյակային տվյալներին, հաղորդել է Ղամիշլիի օդանավակայանից ռուսական տեխնիկայի մասնակի դուրսբերման մասին՝ անհայտ պատճառով։

Ղամիշլիի օդանավակայանից զատ՝ Սիրիայում գտնվող ռուսական ուժերը պահպանում են Լաթաքիա նահանգում գտնվող Խմեյմիմի ավիաբազան և Տարտուսում գտնվող ռազմածովային լոգիստիկայի բազան։

Սիրիական Հասակե, Դեյր Զոր և Ռաքքա նահանգները մեկ տասնամյակից ավելի վերահսկվում էին քրդերի կողմից։ Հունվարի կեսերին, կառավարական զորքերի հարձակումից հետո, Դամասկոսը հայտարարեց, որ քրդական Սիրիայի դեմոկրատական ​​ուժերը (SDF) ստորագրել են համաձայնագիր, որով այդ տարածքները փոխանցվում են կառավարության վերահսկողությանը։

Թարգմանությունը՝ Էմմա Չոբանյանի