ԵՀ-ն Վրաստանի դիվանագիտական անձնագրեր ունեցողների համար առանց վիզայի ռեժիմը դադարեցնելու մեխանիզմ է գործարկում

Վրացական իշխանությունների գործողությունները խաթարում են այն սկզբունքները, որոնց վրա հիմնված է վիզայի ազատականացումը։ Այս սմասին հայտարարել է Եվրահանձնաժողովի խոսնակ Մարկուս Լամերտը, գրում է Эхо Кавказа-ն:

Նա լրագրողներին ասել է, որ Եվրահանձնաժողովը սկսել է վրացական դիվանագիտական, ծառայողական և պաշտոնական անձնագրերի տերերի համար առանց վիզայի ռեժիմի դադարեցման գործընթացը։

«Վիզայի ազատականացման նպատակն է՝ ամրապնդել մարդկանց միջև շփումները և խթանել ընդհանուր արժեքները, ներառյալ՝ մարդու իրավունքների և ժողովրդավարական սկզբունքների հարգանքը։ Եվրոպական հանձնաժողովը կարծում է, որ վրացական իշխանությունների գործողությունները խաթարում են այդ սկզբունքները, անհամատեղելի են ԵՄ նորմերի և արժեքների հետ, խոչընդոտում են Եվրամիության և Վրաստանի միջև տնտեսական, մարդասիրական, մշակութային, գիտական ​​և այլ կապերի կայուն զարգացմանը»,- ընդգծել է նա։

Եվրահանձնաժողովի խոսնակը նաև հիշեցրել է առանց վիզայի ռեժիմի կասեցման երկփուլ մոտեցումը։

«Որպես առաջին քայլ՝ Եվրոպական հանձնաժողովն այժմ իր գնահատականը ներկայացրել է Եվրոպական խորհրդարանին և ԵՄ Խորհրդին։ Ընդունվելուց հետո սա կապահովի ԵՄ բոլոր անդամ պետություններում դիվանագիտական ​​անձնագրերի տերերի համար առանց վիզայի ճանապարհորդության միաժամանակյա դադարեցումը։ Վիզայի կասեցման մեխանիզմի շրջանակում, հաշվի առնելով, որ այն վերանայվել և ուժի մեջ է մտել անցյալ տարվա վերջին, հնարավոր է երկփուլ մոտեցում։ Հնարավոր է, որ որոշ պահի, եթե չեղարկումը շարունակվի, միջոցառումները կարող են տարածվել ամբողջ բնակչության վրա, բայց դա ավտոմատ կերպով տեղի չի ունենա»,- հայտարարել է Լամերտը։

2025 թվականի դեկտեմբերի վերջին ուժի մեջ է մտել առանց վիզային ռեժիմի դադարեցման վերաբերյալ Եվրամիության թարմացված մեխանիզմը: Նոր համակարգը, ինչպես սպասվում է, կարող է ազդել նաև Վրաստանի վրա՝ Բրյուսելից և այլ եվրոպական մայրաքաղաքներից իշխող կուսակցության քաղաքականության նկատմամբ քննադատության աճի ֆոնին:

Թարգմանությունը՝ Էմմա Չոբանյանի