Թուրքիան թույլ չի տա անջատողական սպառնալիք հարավային սահմանին. Էրդողանը՝ քրդերին

Թուրքիայի նախագահ Ռեջեփ Թայիփ Էրդողանը հայտարարել է, որ Անկարան վճռականորեն աջակցում է Սիրիայի միասնական, անկախ պետություն կառուցելու պայքարին և չի հանդուրժի անջատողական կառույց, որը սպառնում է ազգային անվտանգությանը իր հարավային սահմանին։

«Մենք անկեղծորեն շնորհավորում ենք Սիրիայի կառավարությանը, սիրիական բանակին և եղբայրական սիրիական ժողովրդին վերջին շաբաթների ընթացքում նրանց հաջող գործողությունների համար։ Մեծապես գոհ ենք երեկ ձեռք բերված հրադադարի համաձայնագրից։ Հուսով ենք, որ այս խնդիրը վերջնականապես կլուծվի՝ առանց հետագա արյունահեղության, որ Սիրիայի հյուսիսում որոշակի տարածքներում սեղմված ահաբեկչական կազմակերպությունը վայր կդնի զենքերը և կվերացվի»,- չորեքշաբթի իր ղեկավարած «Արդարություն և զարգացում» կուսակցության խորհրդարանական խմբակցության նիստում ասել է Էրդողանը։

Նա նշել է, որ YPG/SDF-ը մարտի 10-ի համաձայնագրով ինտեգրման համար համաձայնեցված ժամանակացույցի շրջանակում որևէ դրական քայլ չի ձեռնարկել և շարունակել է ճնշում գործադրել «օկուպացված տարածքներում» բնակվող քաղաքացիական անձանց նկատմամբ՝ միաժամանակ հարձակվելով քաղաքացիական և ռազմական թիրախների վրա։

«Պատճառը, անկեղծ ասած, SDF կոչվող կառույցի անզիջում, ձգձգող, անընդհատ սրվող, ժամանակի հետ խաղացող վերաբերմունքն էր։ Այս գործընթացում մենք մեր համապատասխան հաստատությունների միջոցով բոլոր կողմերին անհրաժեշտ ուղղորդումներ ենք տրամադրել։ Մենք բոլոր ջանքերը գործադրել ենք՝ հանգույցը լուծելու և ճգնաժամը թեժ հակամարտության վերածումը կանխելու համար»,- ասել է Էրդողանը։

Թուրքիայի նախագահը նաև նշել է, որ այլ գործող անձինք նույնպես միջամտել են և առաջարկություններ արել մարտի 10-ի համաձայնագրի իրականացման համար, սակայն ահաբեկչական խմբավորման մաքսիմալիստական ​​​​դիրքորոշման մեջ որևէ փոփոխություն չի եղել։

Էրդողանը նաև դատապարտել է Նուսայբին-Ղամիշլի սահմանին թուրքական դրոշի վրա հարձակումը՝ խոստանալով պատասխանատվության ենթարկել մեղավորներին։ Ազգային պաշտպանության և Արդարադատության նախարարությունները, ըստ նրա, սկսել են անհրաժեշտ հետաքննությունները։

Նա ընդգծել է, որ Սիրիայի քրդերը Թուրքիայի «սեփական եղբայրներն ու քույրերն» են, և հիշեցրել իր ջանքերը որպես վարչապետ 2008 թվականից ի վեր՝ Ասադի ռեժիմի հետ հանդիպումներում նրանց իրավունքների հարցը բարձրացնելու համար։

Միաժամանակ, Թուրքիայի նախագահը գովաբանել է Սիրիայի անցումային ղեկավար Ահմեդ ալ-Շարաայի հրամանագրերը, որոնք քրդերին իրավունքներ են շնորհում։

«Հունվարի 16-ին հայտարարված հռչակագիրը կամքի պատմական հռչակագիր է, որը հիմնված է Սիրիայի մեր քուրդ եղբայրների հավասար և արդար մասնակցության վրա սիրիական պետությանը։ Չնայած այս բոլոր դրական քայլերին և մոտեցումներին՝ ահաբեկչական կազմակերպությունը, ցավոք, ընտրեց արյունը, հակամարտությունը, սպանությունները և մահը՝ քրդերի բարեկեցության և խաղաղության փոխարեն»,- հայտարարել է նա։

Էրդողանը նաև նշել է, որ «Թուրքիա՝ ահաբեկչությունից զերծ» գործընթացը հաջողությամբ անցել է դիմադրության փորձությունները՝ չնայած վերջին 15 ամիսների ընթացքում կատարված տարբեր դիվերսիոն փորձերին։

Թուրքիայի նախագահը, միաժամանակ, հայտնել է, որ արդյունավետ հեռախոսազրույց է ունեցել ԱՄՆ նախագահ Դոնալդ Թրամփի հետ՝ Սիրիայի հարցերը քննարկելու համար։

Թարգմանությունը՝ Էմմա Չոբանյանի