14.02.2026 | 23:13
Ալիևը Ռուսաստանին մեղադրել է Կիևում Ադրբեջանի դեսպանատանը հարվածելու համար
Թրամփը հայտարարել է, որ Իրանը «կջնջվի երկրի երեսից», եթե իր հետ «ինչ-որ բան պատահի»
Քաղաքականություն
21.01.2026 | 15:17
ԱՄՆ նախագահ Թրամփը զգուշացրել է Իրանին, որ Թեհրանի առաջնորդների կողմից շարունակվող սպանության սպառնալիքներին կպատասխանի երկիրը «պայթեցնելով», գրում է The Hill-ը։
«Դե՝ նրանք չպետք է դա անեին, բայց ես ծանուցում եմ թողել։ Ինչ էլ որ պատահի, մենք ամբողջը պայթեցնելու ենք, ամբողջ երկիրը պայթեցնելու ենք»,- հայտարարել է Թրամփը News Nation-ի «Katie Pavlich Tonight» հաղորդման ժամանակ։
Ըստ հրապարակման՝ նախկին նախագահ Ջո Բայդենի ժամանակաշրջանի հետախուզության պաշտոնյաները Թրամփին տեղեկացրել էին իր դեմ ուղղված ենթադրյալ սպառնալիքների մասին 2024 թվականի նախագահական քարոզարշավի ժամանակ։ Նախկին գլխավոր դատախազ Մերիկ Գարլանդը հայտարարել էր, որ դավադրությունը վրեժխնդրություն էր 2020 թվականին՝ Թրամփի պաշտոնավարման առաջին ժամկետի ընթացքում ԱՄՆ-ի կողմից իրանցի գեներալ Ղասեմ Սոլեյմանիի սպանության համար։ Թրամփը հայտարարել է, որ նախագահ Բայդենը «պետք է ինչ-որ բան ասեր» այս հարցի վերաբերյալ՝ հավելելով, որ նախագահները պետք է պաշտպանեն միմյանց նման հարցերում։
«Բայց ես շատ հստակ հրահանգներ ունեմ։ Անկախ նրանից, թե ինչ կպատահի, նրանց կջնջեն երկրի երեսից»,- հայտարարել է Թրամփը։
ԱՄՆ նախագահը նախկինում հայտարարել էր, որ ինքը հրահանգել է ոչնչացնել Իրանը, եթե այդ երկիրը սպանի իրեն։ Սպիտակ տան ղեկավարն այս դիտարկումն արել է պաշտոնը ստանձնելուց անմիջապես հետո գործադիր հրամանագիր ստորագրելիս, որը նրան տվել է բոլոր հնարավոր գործիքները՝ Իրանի կառավարության հետ շփվելու և Թեհրանի նկատմամբ առավելագույն ճնշում գործադրելու համար։
«Նրանք դա չեն արել, և դա նրանց համար սարսափելի բան կլինի։ Ոչ թե իմ պատճառով, եթե նրանք դա անեին, կոչնչանային։ Դա կլիներ վերջը։ Ես հրահանգներ եմ թողել, եթե նրանք դա անեն, կոչնչանան, ոչինչ չի մնա։ Եվ նրանք չպետք է կարողանան դա անել»,- այդ ժամանակ ասել էր Թրամփը։
Իրանի գերագույն հոգևոր առաջնորդ այաթոլլահ Ալի Խամենեին ԱՄՆ-ին մեղադրել էր Իրանի կառավարության դեմ դավադրություն կազմակերպելու և բողոքի ցույցերը սատարելու մեջ՝ պնդելով, որ ԱՄՆ-ը փորձում է «կուլ տալ Իրանը»։
«Մենք մտադիր չենք երկիրը տանել դեպի պատերազմ։ Այնուամենայնիվ, մենք բաց չենք թողնի նաև երկրի ներսում հանցագործներին։ Ներքին հանցագործներից ավելի վատը միջազգային հանցագործներն են։ Մենք նրանց նույնպես բաց չենք թողնի»,- գրել է Խամենեին X սոցիալական հարթակում։
Թարգմանությունը՝ Էմմա Չոբանյանի
