Ճապոնիայի նախկին վարչապետ Սինձո Աբեի սպանության մեջ մեղադրվողը ցմահ ազատազրկման է դատապարտվել

Ճապոնիայի դատարանը ցմահ ազատազրկման է դատապարտել նախկին վարչապետ Սինձո Աբեի ուղղությամբ 2022 թվականին մահացու կրակոցներ արձակելու մեջ մեղադրվողին՝ ինքնաշեն զենքով կրակոցները որակելով «զզվելի և չափազանց դաժան», գրում է Kyodo News-ը։

Նարայի շրջանային դատարանը 45-ամյա Տեցույա Յամագամիի նկատմամբ դատավճիռ է կայացրել՝ համաձայն մեղադրողի պահանջի։ Յամագամին խոստովանել է, որ Աբեին սպանել է ինքնաշեն հրազենով, երբ նախկին վարչապետը ելույթ էր ունենում Ճապոնիայի արևմուտքում գտնվող Նարա քաղաքում։

Դատավարության ընթացքում փաստաբանները պնդում էին, որ Յամագամիի ազատազրկման ժամկետը չպետք է գերազանցի 20 տարին։ Նրանք պնդում էին նաև, որ Յամագամին կրոնական խմբի կողմից պատճառված վնասի զոհ է եղել, և որ նրա «ողբերգական» մանկությունն է նրան դրդել սպանել Աբեին։

Մեղադրյալը նշել է, որ ինքը թշնամանք է ունեցել Միավորման եկեղեցու նկատմամբ, քանի որ իր ընտանիքը ֆինանսական ճգնաժամի է բախվել մոր կողմից կրոնական խմբին կատարված խոշոր նվիրատվությունների պատճառով, որոնց ընդհանուր գումարը կազմել է 100 միլիոն իեն (633,000 դոլար): Նա ասել է, որ կարծում է՝ Աբեն, որը կրակոցի ժամանակ 67 տարեկան էր, «Միավորման եկեղեցու քաղաքական ներգրավվածության կենտրոնում» էր Ճապոնիայում: Աբեն, որը Ճապոնիայի ամենաերկար պաշտոնավարած վարչապետն էր, մնացել էր ազդեցիկ քաղաքական գործիչ նույնիսկ 2020 թվականին հրաժարական տալուց հետո:

Դատարանը Յամագամիին մեղավոր է ճանաչել ոչ միայն սպանության, այլև հրազենի և սրերի վերահսկողության մասին օրենքի դրույթները խախտելու մեջ։

Քանի որ գործը լույս է սփռել Միավորման եկեղեցու կողմից անդամներից կործանարար նվիրատվություններ պահանջելու վրա, հետաքննություն է սկսվել, որի արդյունքում Տոկիոյի շրջանային դատարանի որոշմամբ եկեղեցին լուծարվել է և զրկվել կրոնական կազմակերպության հարկային արտոնություններից։

Թարգմանությունը՝ Էմմա Չոբանյանի