18.08.2026 | 20:13
Գալյանն ու ԱՄՆ գործերի ժամանակավոր հավատարմատարը քննարկել են բարեփոխումների օրակարգը
Ադիգեայում բազմահարկ շենք է հրդեհվել, 11 մարդ վիրավորվել է. ըստ տեղեկությունների՝ շենքին ռուսական ՀՕՊ հրթիռն է հարվածել
Քաղաքականություն
21.01.2026 | 12:50
ՌԴ Նոր Ադիգեայում անօդաչու թռչող սարքի հարվածից հետո բազմահարկ շենք է վնասվել։ Ադիգեայի Հանրապետության ղեկավար Մուրատ Կումպիլովի խոսքով՝ տասմեկ մարդ վիրավորվել է, որոնցից ինը հոսպիտալացվել են, այդ թվում՝ երկու երեխա, գրում է Current time-ը։
Միջադեպի մասին տելեգրամյան առաջին գրառման մեջ Կումպիլովը նկարագրել է անօդաչու թռչող սարքի թռիչքը, իսկ երկրորդում՝ «թշնամու հարձակումը»։ Սակայն ուկրաինական Exilenova+ և Supernova+ տելեգրամյան ալիքները պնդում են, որ ռուսական ՀՕՊ հրթիռն է հարվածել շենքին։
Astra-ն վերլուծել է ականատեսների տեսագրությունները և նույնպես եզրակացրել, որ հարվածողը ռուսական հրթիռ է եղել։
«Ականատեսի տեսանյութը հստակորեն արձանագրել է այն պահը, երբ հրթիռը թռել է և հարվածել տանը»,- նշում է Astra-ն։
Ըստ աղբյուրի՝ այս շենքից մեկ կիլոմետր հեռավորության վրա էլեկտրական ենթակայան կա։
Քաղաքային վարչակազմն արտակարգ դրություն է հայտարարել շրջանային մակարդակով։ Շապսուգ հանգստի կենտրոնում բացվել է ժամանակավոր կեցության կենտրոն։ Բնակիչներին թույլ կտրվի մտնել տներ և բնակարաններ փուլ առ փուլ, երբ իրավապահ մարմիններն ավարտեն իրենց հետաքննությունը։
Նախնական տեղեկությունների համաձայն՝ շենքի մոտակայքում այրվել է 15 մեքենա, իսկ 25-ը՝ վնասվել։
Օրյոլի մարզի նահանգապետ Անդրեյ Կլիչկովը հայտարարել է, որ անօդաչու թռչող սարքի հարձակումն «աննշան վնաս է հասցրել մարզի վառելիքի և էներգետիկ ենթակառուցվածքներին»։ Օրյոլ քաղաքում և մարզի այլ մունիցիպալիտետներում վնասվել են մի քանի տներ և մասնավոր տրանսպորտային միջոցներ։
«Օրյոլի Սևերնի և Ժելեզնոդորոժնի շրջանների որոշ տներում էլեկտրաէներգիայի և ջրի անջատումներ են տեղի ունեցել, հետևանքները վերացվում են։ Արտակարգ իրավիճակների նախարարության և իրավապահ մարմինների աշխատակիցները դեպքի վայրում մասնագիտացված աշխատանքներ են իրականացնում»,- գրել է նա՝ հավելելով, որ ոչ ոք չի տուժել։
Պրիմորսկ-Ախտարսկում էլ անօդաչուի բեկորներ են ընկել՝ կոտրելով երկու մասնավոր տների պատուհանները: Անօդաչու թռչող սարքի բեկորները նաև ընկել են «Աֆիպի» նավթավերամշակման գործարանի տարածքում: Վիրավորներ և ենթակառուցվածքների վնասներ չկան: Կրասնոդարի երկրամասի արտակարգ իրավիճակների արձագանքման շտաբի տվյալներով՝ հրդեհ է բռնկվել, որը մարվել է:
Ռուսաստանի Պաշտպանության նախարարությունը հայտնել է, որ հունվարի 20-ի երեկոյան ժամը 20:00-ից մինչև հունվարի 21-ի առավոտյան ժամը 7:00-ն ընկած ժամանակահատվածում խոցվել է 128 ուկրաինական անօդաչու թռչող սարք։
Թարգմանությունը՝ Էմմա Չոբանյանի
