29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
Թրամփի՝ Դավոս ուղևորվող ինքնաթիռն անսարքության պատճառով վերադարձել է ԱՄՆ
Քաղաքականություն
21.01.2026 | 10:26
ԱՄՆ նախագահ Դոնալդ Թրամփի Air Force One ինքնաթիռը Դավոսում Համաշխարհային տնտեսական ֆորումին մեկնելու ճանապարհին ստիպված է եղել վերադառնալ ԱՄՆ՝ «աննշան» էլեկտրոնային խափանման պատճառով, գրում է DW-ի ռուսական ծառայությունը։
Թրամփին տեղափոխող ինքնաթիռը նախազգուշական նպատակով է վերադարձել Էնդրյուսի ռազմական բազա, հայտարարել է Սպիտակ տան մամուլի քարտուղար Քերոլայն Լիվիթը։
Ռազմաբազայում Թրամփը և նրան ուղեկցողները կնստեն մեկ այլ ինքնաթիռ և կշարունակեն ճանապարհորդությունը։ ԱՄՆ նախագահի ելույթը Դավոսի ֆորումում նախատեսված է չորեքշաբթի ժամը 14:30-ին՝ Գրենլանդիայի ճգնաժամի ֆոնին։ Մեկնելուց առաջ Թրամփն ասել է, որ պատկերացում չունի, թե ինչպես կանցնի իր այցը Դավոս։
Իր ելույթից հետո ԱՄՆ նախագահը նախատեսում է հանդիպել մի քանի պետությունների և կառավարությունների ղեկավարների հետ Համաշխարհային տնտեսական ֆորումի ամենամյա նիստի շրջանակում: Քննարկումները, ինչպես սպասվում է, կանդրադառնան Գրենլանդիայի վերաբերյալ ԱՄՆ ծրագրերին: Այս տարի ԱՄՆ-ն Դավոսում ներկայացված է անսովոր մեծ պատվիրակությամբ։
Թրամփի վերջին սպառնալիքները՝ մաքսատուրքեր սահմանել եվրոպական ութ երկրների համար, որոնց նա անվանել է Գրենլանդիայի բռնակցման իր առաջարկի հակառակորդներ, սուր քննադատության են արժանացել։ Ֆրանսիայի նախագահ Էմանուել Մակրոնը դրանք անվանել է «սկզբունքորեն անընդունելի, հատկապես, երբ դրանք օգտագործվում են որպես ճնշման լծակ տարածքային ինքնիշխանության նկատմամբ»։
Թարգմանությունը՝ Էմմա Չոբանյանի
