05.08.2026 | 17:52
Կենտրոնում գրեթե ամբողջ շաբաթ փոշու պարունակությունը գերազանցել է թույլատրելի նորման
Ադրբեջանն ու Հայաստանը փակել են պատերազմի էջը. Ալիև
Քաղաքականություն
20.01.2026 | 23:00
Ադրբեջանն ու Հայաստանը որոշում են կայացրել փակել պատերազմի էջը։ Ադրբեջանի նախագահ Իլհամ Ալիևն այս հայտարարությունն արել է Դավասում Համաշխարհային տնտեսական ֆորումի տարեկան հանդիպման շրջանակում կազմակերպված պանելային քննարկմանը։
Նրա խոսքով՝ պատերազմի շարունակությունը կարող էր հանգեցնել շատ ծանր հետևանքների։
«Ես ուզում եմ բացարձակապես անկեղծ լինել։ Մենք կարող էինք շարունակել, բայց դա կհանգեցներ անվերջ պատերազմների, ավելի մեծ տառապանքների և նոր զոհերի։ Այդ դեպքում պատերազմը երբեք չէր ավարտվի։ Եվ ինչ-որ մեկը պետք է կանգնեցներ այն։ Մենք որոշում կայացրինք դադարեցնել։ Այո, դա Հայաստանի և Ադրբեջանի ղեկավարության համատեղ որոշումն էր՝ փակել այս էջը և օգտվել խաղաղության հնարավորությունից»,- ասել է Իլհամ Ալիևը։
Ըստ նրա՝ Հայաստանի և Ադրբեջանի միջև խաղաղության գործընթացը միջազգային քաղաքականության մեջ եզակի դեպք է։
«Սա, հավանաբար, այն եզակի դեպքերից է, երբ երեք տասնամյակ տևած պատերազմից հետո կողմերին հաջողվել է իրական խաղաղության հասնել»,- ասել է Ադրբեջանի նախագահը։
Նրա բնորոշմամբ՝ պատմական նվաճում էր, որ երկու երկրները անցյալ օգոստոսին խաղաղության համաձայնագիր ստորագրեցին՝ վերջ դնելով ավելի քան երեսուն տարի տևած պատերազմին և արյունահեղությանը։
«Այս խաղաղության համաձայնագրի յուրահատկությունն այն է, որ այն ստորագրվել է վերջին արյունալի բախումից երկու տարի անց։ Սա ցույց է տալիս, որ եթե երկու կողմերն էլ ունեն ուժեղ քաղաքական կամք և խաղաղության նկատմամբ նվիրվածություն, հաշտեցումը հնարավոր է համեմատաբար կարճ ժամանակում։ Այժմ ստորագրված համաձայնագիրը գործնական արդյունքներ է տալիս»,- հավելել է Ալիևը։
Նա նշել է, որ Ադրբեջանի և Հայաստանի միջև ստորագրված փաստաթղթերը սկսում են գործնական արդյունքներ տալ և որ ո՛չ Հայաստանը, ո՛չ էլ Ադրբեջանը որպես անկախ երկրներ երբեք խաղաղության մեջ չեն եղել։
«Մենք հինգ կամ վեց ամիս պարզապես խաղաղության մեջ չենք ապրում, մենք վայելում ենք այն։ Երբ մենք անկախություն ձեռք բերեցինք 1991 թվականին, մենք արդեն ռազմական բախման մեջ էինք։ Սակայն այսօր խաղաղության պտուղները դրսևորվում են համագործակցության մեջ։ Մասնավորապես՝ ռազմավարական առումով կարևոր բեռներ, այդ թվում՝ նավթամթերք, Ադրբեջանից տեղափոխվում են Հայաստան։ Սա ինքնին հանգեցնում է գների անկման։ Ընդամենը երկու կամ երեք տարի առաջ սա լիովին անհնար կլիներ, բայց այսօր դա արդեն իրականություն է։ Եվ ես կարծում եմ, որ ոչինչ չի կարող խոչընդոտել այս գործընթացին»,- ասել է Ադրբեջանի նախագահը։
Նա նշել է, որ կողմերը պետք է ևս մեկ քայլ անեն՝ հստակ ցույց տան խաղաղ ապրելու արդյունքները՝ այս գործընթացին երկու հասարակություններից լիարժեք աջակցություն ստանալու համար։
«Այնուամենայնիվ, ես շատ լավատես եմ, քանի որ ձեռք բերված արդյունքները հսկայական օգուտներ են բերում Հայաստանին, Ադրբեջանին և ամբողջ Հարավային Կովկասին և ծառայում են որպես օրինակ, թե ինչպես կարող են խորապես թշնամաբար տրամադրված երկրները անցնել դեպի համագործակցություն»,- հավելել է Ադրբեջանի ղեկավարը։
Թարգմանությունը՝ Էմմա Չոբանյանի
