03.04.2026 | 00:12
Վարդան Ղուկասյանի որդու խափանման միջոցը փոխվել է. նա տնային կալանքի տակ է
Իմպերիալիստական հավակնությունները վերածնվում են. Մակրոնը քննադատել է Թրամփի՝ «կանոններից զուրկ աշխարհը»
Քաղաքականություն
20.01.2026 | 20:48
Ֆրանսիայի նախագահ Էմանուել Մակրոնը քննադատել է ավելի ու ավելի ոչ լիբերալ աշխարհակարգը։ The National-ը գրում է, որ Ֆրանսիայի նախագահը խոսել է «կանոններից զուրկ աշխարհի անցնելու մասին, որտեղ միջազգային իրավունքը ոտնահարվում է, և որտեղ, կարծես, միայն ուժեղագույնի օրենքն է կարևոր»։
Դավոսում Համաշխարհային տնտեսական ֆորումում նրա ելույթը քողարկված հարձակում էր ԱՄՆ նախագահ Դոնալդ Թրամփի վրա, որը, ըստ նախատեսվածի, ֆորումի անցկացման վայր կժամանի գիշերը և ելույթ կունենա չորեքշաբթի, գրում է պարբերականը։
«Իմպերիալիստական հավակնությունները վերածնվում են»,- ասել է Մակրոնը՝ մեջբերելով Գրենլանդիան գրավելու՝ ամերիկյան ծրագրերը։
Նա նաև նշել է, որ չորս տարվա ռուսական պատերազմն Ուկրաինայում և հակամարտությունները Մերձավոր Արևելքում օրինակ են այն բանի, թե ինչպես է քայքայվել ավանդական աշխարհակարգը։ Մակրոնը Եվրոպան նկարագրել է որպես մի վայր, «որտեղ օրենքի գերակայությունը և կանխատեսելիությունը դեռևս գնահատվում են»։
«Այն լավ տեղ է, լավ տեղ այսօրվա և վաղվա համար։ Մենք կանենք լավագույնը՝ ավելի ուժեղ Եվրոպա ունենալու համար, շատ ավելի ուժեղ»,- հայտարարել է նա։
Համաշխարհային տնտեսական ֆորումի համանախագահ Լարի Ֆինկի հետ հարցուպատասխանի ժամանակ Մակրոնը «Միացյալ Նահանգների թշնամիների նկատմամբ» լրացուցիչ մաքսատուրքերի սահմանումն անվանել է «խելագարություն»։
«Մենք բոլորս պետք է շատ հանգիստ մնանք… այսքան շատ հնարավորություններով և այսքան շատ մարտահրավերներով», – հավելել է նա։
BlackRock-ի ղեկավար Ֆինկը, որն Ամերիկայի ամենահարուստ գործարարներից է, գովաբանել է Մակրոնին նրա «մարդկայնության և առաջնորդության» համար։
Ավելի ուշ Մակրոնը նշել է, որ չի ծրագրում խոսել Դոնալդ Թրամփի հետ Դավոս ժամանելուց հետո։
Մինչ այս, Թրամփը սպառնացել էր 200% մաքսատուրք սահմանել ֆրանսիական գինիների ներմուծման համար։
Թարգմանությունը՝ Էմմա Չոբանյանի
