18.08.2026 | 22:17
Հայաստանի մի շարք հասցեներում էլեկտրաէներգիայի անջատումներ կլինեն
Ադրբեջանի նկատմամբ կողմնակալ դիրքորոշումը ստեղծվում է լոբբիստական խմբերի, հատուկ ուժերի կողմից. Ալիևը բողոքել է Եվրախորհրդարանից
Քաղաքականություն
20.01.2026 | 18:49
Մենք տարիներ շարունակ չենք համագործակցում Եվրախորհրդարանի կամ Եվրոպայի խորհրդի Խորհրդարանական վեհաժողովի հետ։ Ադրբեջանի նախագահ Իլհամ Ալիևն այս մասին հայտարարել է հունվարի 20-ին Դավոսում Euronews-ին տված հարցազրույցում՝ անդրադառնալով Եվրախորհրդարանի կողմից Ադրբեջանի հասցեին անընդհատ քննադատությանը։
«Այո, մենք դադարել ենք արձագանքել։ Նախկինում պատասխանում էինք, բայց, իհարկե, միանգամայն պարզ է, որ Ադրբեջանի նկատմամբ այս կողմնակալ դիրքորոշումը ստեղծվում է հատուկ լոբբիստական խմբերի, հատուկ ուժերի կողմից, որոնք չեն կարող հանդուրժել Ադրբեջանի անկախ քաղաքականությունը։ Ահա թե ինչու մենք տարիներ շարունակ չենք համագործակցել Եվրախորհրդարանի կամ Եվրոպայի խորհրդի Խորհրդարանական վեհաժողովի հետ։ Մենք համագործակցում ենք Եվրահանձնաժողովի հետ, և դա մեզ համար բավական է»,- հայտարարել է Ադրբեջանի ղեկավարը։
Ըստ Ալիևի՝ Եվրախորհրդարանն իրեն շատ անհարմար դրության մեջ է դնում՝ Բաքվին մեղադրելով մի բանի մեջ, որը «երբեք չի արել»։
«Այդ թվում, այսպես կոչված, ագրեսիվ դիրքորոշման մեջ Հայաստանի նկատմամբ, մինչդեռ Հայաստանն ինքն է կարևորում իր հարաբերություններն Ադրբեջանի հետ։ Եվ անցյալ օգոստոսին Սպիտակ տանը նախաստորագրվեց Հայաստանի և Ադրբեջանի միջև խաղաղության համաձայնագիրը։ Հետևաբար, ես հույս ունեմ, որ Եվրախորհրդարանի անդամները կգտնեն համարձակություն՝ վերանայելու իրենց անարդար քաղաքականությունն Ադրբեջանի նկատմամբ»,- ասել է Ալիևը։
Թարգմանությունը՝ Էմմա Չոբանյանի
