Հայաստանի և Ադրբեջանի համատեղ ջանքերով կհասնենք հավերժական ​​խաղաղության Կովկասում. սա է մեր նպատակը. Ալիև

Ադրբեջանն իր անկախ պատմության ընթացքում երբեք խաղաղության մեջ չի ապրել, և սա յուրահատուկ զգացողություն է։ Այս մասին հայտարարել է Ադրբեջանի նախագահ Իլհամ Ալիևը Euronews-ին տված բացառիկ հարցազրույցում։

«Այսօր Հարավային Կովկասը ևս մտնում է զարգացման նոր փուլ։ Մենք խաղաղության մեջ ենք ապրում ընդամենը հինգ կամ վեց ամիս, մենք սովորում ենք դրան։ Մեր անկախ պատմության ընթացքում երբեք խաղաղության մեջ չենք ապրել, և դա հատուկ զգացողություն է։ Եվ, իհարկե, սա հրաշալի հնարավորություն է։ Այսօր Հայաստանի և Ադրբեջանի հարաբերություններն արդեն վերածվում են համագործակցության։ Մենք վերացրել ենք Հայաստան բեռնափոխադրումների բոլոր սահմանափակումները։ Ավելին, մենք սկսել ենք Հայաստանին մատակարարել կարևորագույն ապրանքներ, հիմնականում՝ նավթամթերք, որոնցից երկիրը մեծապես կախված է։ Եվ սա երկու կողմերի համար շահեկան իրավիճակ է։ Հետևաբար, ես կարծում եմ, որ Հայաստանի և Ադրբեջանի, այդ թվում՝ քաղաքացիական հասարակության համատեղ ջանքերի շնորհիվ մենք կհասնենք ոչ թե երկարաժամկետ, այլև հավերժական ​​խաղաղության Կովկասում։ Սա է մեր նպատակը»,- ասել է Ադրբեջանի ղեկավարը՝ անդրադառնալով Զայեդի մարդասիրական մրցանակին արժանանալուն։

Նա ասել է, թե իր համար մեծ պատիվ է ստանալ այդ հեղինակավոր մրցանակը, հատկապես, որ այն կրում է ԱՄԷ-ի հիմնադիր, հանգուցյալ շեյխ Զայեդի անունը, ինչը համարում է Կովկասում խաղաղություն հաստատելու ջանքերի ճանաչում՝ ավելի քան երեսուն տարի տևած արյունահեղությունից, հակամարտությունից և պատերազմից հետո։

Ալիևը նաև շեշտել է, թե Ադրբեջանը Հարավային Կովկասի միակ երկիրն է, որը տիրապետում է էներգետիկ ռեսուրսների և արտահանում է դրանք տարածաշրջանի այլ երկրներ: Վրաստանը տարիներ շարունակ Ադրբեջանից էներգիա է ներմուծել, և հիմա նույնն է անում նաև Հայաստանը:

Ինչ վերաբերում է Եվրոպային և Եվրամիությանը, ըստ նրա, էներգետիկ համագործակցությունը շարունակում է ընդլայնվել. արդեն իսկ բնական գազ են մատակարարում 16 երկրների, որոնցից 10-ը Եվրամիության անդամ են։

Թարգմանությունը՝ Էմմա Չոբանյանի