29.10.2026 | 18:39
«Բավարիայի» գլխավոր մարզիչը դուրս է գրվել հիվանդանոցից
Զելենսկիի Դավոս այցը հարցականի տակ է Ռուսաստանի գիշերային հարձակումից հետո․ Axios
Քաղաքականություն
20.01.2026 | 17:52
Ուկրաինայի նախագահ Վլադիմիր Զելենսկին դեռ չի մեկնում Դավոս, գիշերը ռուսական հրետակոծությունից հետո մնում է Կիևում։ Այս մասին հաղորդում է ՌԲԿ-Ուկրաինան՝ հղում անելով Axios-ի լրագրող Բարաք Ռավիդի X-ում գրառմանը։
Միևնույն ժամանակ, Ռավիդը նշել է, որ Զելենսկին կարող է մեկնել Դավոս, եթե երկկողմ հանդիպում լինի ԱՄՆ նախագահ Դոնալդ Թրամփի հետ՝ Ուկրաինայի վերականգնման վերաբերյալ համաձայնագիր ստորագրելու համար։ Ո՛չ Զելենսկին, ո՛չ էլ նախագահի աշխատակազմը պաշտոնապես չեն մեկնաբանել այս տեղեկությունը։
56-րդ Համաշխարհային տնտեսական ֆորումը Շվեյցարիայի Դավոսում բացվել է երկուշաբթի՝ հունվարի 19-ին, այն կտևի մինչև հունվարի 23-ը։
Ուկրաինայի Ազգային անվտանգության և պաշտպանության խորհրդի քարտուղար Ռուստեմ Ումերովը, որը գլխավորում է ուկրաինական բանակցային թիմը, հայտարարել էր, որ ԱՄՆ-ի հետ երկխոսությունը կշարունակվի Դավոսում կայանալիք ֆորումի ընթացքում: Ակնկալվում է, որ Թրամփը անձամբ կմասնակցի Դավոսի համաժողովին. անցյալ տարի նա մասնակցել էր հեռակա կարգով։
Ուկրաինայի արտաքին գործերի նախարար Անդրեյ Սիբիհան նշել է, որ Ուկրաինան անպայման կմասնակցի այս տարի Դավոսում կայանալիք Համաշխարհային տնտեսական ֆորումին: Ուկրաինական պատվիրակությունը ներկայացված կլինի այնտեղ ամենաբարձր մակարդակով։
Ավելի վաղ լրատվամիջոցները հայտնել էին, որ Ուկրաինայի նախագահ Վլադիմիր Զելենսկին և ԱՄՆ նախագահ Դոնալդ Թրամփը կարող են հունվարի վերջին ստորագրել Ուկրաինայի հետպատերազմյան վերականգնման վերաբերյալ համաձայնագիրը՝ ընդհանուր առմամբ 800 միլիարդ դոլարի չափով։ Լրատվամիջոցները նշել էին, որ Զելենսկին և Թրամփը համաձայնագիրը կստորագրեն Դավոսում։ Ծրագիրը մշակված է 10 տարվա համար և նախատեսում է պատերազմից հետո Ուկրաինայի վերակառուցում և տնտեսական վերականգնում։
Նշվում է, որ Ռուսաստանի նախագահի հատուկ ներկայացուցիչ Կիրիլ Դմիտրիևը 2022 թվականից ի վեր առաջին անգամ ժամանել է Դավոս՝ ԱՄՆ ներկայացուցիչների հետ հանդիպելու համար։
Թարգմանությունը՝ Էմմա Չոբանյանի
