Ռոբերտ Քոչարյանը թող իր 200 մլն դոլարը ընծայաբերի Ղարաբաղից տեղահանվածներին․ Կոնջորյան․ ՏԵՍԱՆՅՈՒԹ

ԱԺ նիստում ՔՊ խմբակցության ղեկավար Հայկ Կոնջորյանն անդրադարձավ ընդդիմության կողմից իշխանության հասցեին հնչող Հայ առաքելական եկեղեցին «ասպատակելու» մեղադրանքներին։

«Հարգելի՛ գործընկերներ, սիրելի՛ հայրենակիցներ, ուրեմն, Կտրիճ Ներսիսյանը եկեղեցուն պատկանող Սուրբ Գեղարդը, այդ Գեղարդից մի մաս, նվիրել է այլ պետության ներկայացուցչի։ Այն Կտրիճ Ներսիսյանը, որի եղբայրը, ըստ հրապարակված փաստաթղթի, ԿԳԲ-ի գործակալ է։ Հետո մի այլ հոգևորական՝ Կտրիճ Ներսիսյանի մերձավոր շրջապատից, Ասողիկը, ասել է, որ Կտրիճ Ներսիսյանն ունի բացարձակ իրավունք ցանկացած մասունք նվիրել ցանկացածին՝ անկախ նրանից այդ մարդը աշխարհական է, թե հոգևորական։ Այսինքն՝ ի՞նչ է ասում, ասում է՝ ցանկացածին Կտրիճ Ներսիսյանը կարող է տալ։

Այստեղ մենք հիշում ենք, որ Կտրիճ Ներսիսյանը, ով կուսակրոնության ուխտ է տվել, խախտել է այդ ուխտը և ունի զավակ կամ զավակներ, ովքեր աշխարհական են։ Եվ Կտրիճ Ներսիսյանը, ինչպես ասում է Ասողիկը, կարող է ցանկացած բան նաև նվիրաբերել իր աշխարհական զավակին կամ զավակներին, որոնք էլ իրենց հերթին կարող են նվիրաբերել մեկ ուրիշին կամ երրորդ պետությունների։ Հիմա մեր ընդդիմությունն ասում է, որ մենք ենք հարձակվել եկեղեցու վրա, ոչ թե Կտրիճ Ներսիսյանը»,- նշեց նա։

Այնուհետև նա անդրադարձավ պատգամավոր Լիլիթ Գաստյանի երեկվա ելույթին։ Նա նշել էր, որ եկեղեցում ընծայաբերության դարավոր ավանդույթներ կան։

«Հետաքրքիր է իմանալ, ասենք՝ այդ նույն տրամաբանությամբ Լիլիթ Գալստյանի, կարո՞ղ է Ռոբերտ Քոչարյանն էլ ժամանակին ընծայաբերել է Հայաստանի գույքը Ռուսաստանին, կամ պատրաստվում էր ընծայաբերել Մեղրին Ղարաբաղի դիմաց, կամ, օրինակ, պատրաստվո՞ւմ է Ռոբերտ Քոչարյանը, ըստ Դատախազության, իր 200 միլիոն դոլարը ընծայաբերել Ղարաբաղից տեղահանվածներին։ Անցած տարի 250 միլիոն վարկ է վերցրել պետությունը, որ Ղարաբաղից տեղահանվածների բնակարանային հարցը լուծի։ Ես առաջարկում եմ, տիկի՛ն Գալստյան, Ձեր ղեկավարին ասեք, որ իր այդ 200 միլիոնը ընծայաբերի, նվիրի Ղարաբաղից տեղահանվածներին»,- ասաց Կոնջորյանը։

Մանրամասները՝ տեսանյութում։