Քնում են մեքենայում, սպասում օրերով․ հայկական բազմաթիվ բեռնատարներ մնում են Վրաստանի և ՌԴ տարածքում. ՏԵՍԱՆՅՈՒԹ

Բեռնատարի վարորդ Կարեն Ազիզյանն արդեն երեք օր է՝ Վրաստանի տարածքում է։ Պատմում է՝ վատ եղանակի պատճառով հայկական ապրանքներով բարձված ավելի քան 200 բեռնատար է մնացել այնտեղ։ Քնում են մեքենայում, սնվում՝ սննդի հարակից օբյեկտներում։ Ասում է՝ առաջնահերթություն է տրվում վրացական բեռներին, տարբերակում կա անգամ Վրաստանից Հայաստան արտահանվող բեռների պարագայում։ 

Ազիզյանի բեռնատարը բարձված է հայկական արտադրության ըմպելիքներով, որոնք պահպանության հատուկ պայմանների կամ ժամկետի խնդիր չունեն։ Բայց կան վարորդներ, որոնց բեռները պահանջում են սառնարանային պայմաններ և սպասման ամեն ժամը զգալիորեն ավելացնում է փոխադրման ծախսերը։

Իրավիճակը հատկապես բարդ է Վերին Լարսի անցակետում։ Այս պահին շուրջ 2000 բեռնատար մնացել է սահմանին կանգնած։ 

Դրանց շարքում կան հարյուրավոր հայկական բեռնատարներ։ Խնդիրն ավելի է սրվել՝ պայմանավորված այն հանգամանքով, որ ՌԴ-ի տարածքում նախկինում գործող 180 օրվա փոխարեն սահմանային մուտքի թույլատրելի ժամկետը կրճատվել է մինչև 90 օր։ Քննարկում կա, որ բեռնատարների համար մուտքի թույլատրելի ժամկետը նորից  դառնա 180 օր, նշում է «Հայկական Կարիտաս» կազմակերպության միգրացիոն ծրագրի փորձագետ Տաթևիկ Բեժանյանը։

ՌԴ Պետդումայի պատգամավորներից մեկն էլ առաջարկել է Ռուսաստան մուտքի թույլտվության 90-օրյա ժամկետը 30 օր դարձնել։ Բեժանյանի խոսքով՝ հարցը դեռ Դումայի լիագումար նիստի օրակարգ չի մտել, իսկ ՌԴ ՆԳՆ-ն հայտարարել է, որ դա միջազգային փոխադրողներին չի վերաբերվի։ 

Ըստ Տաթևիկ Բեժանյանի՝ շուրջ 100 բեռնափոխադրող վարորդ մուտքի արգելք ունի։ Վրաց-ռուսական սահմանը դեռ չհատած մեր զրուցակիցն էլ հայտնեց, որ մարդատար մեքենաների շարժն արդեն վերականգնվել է։ Հույս ունեն, որ ձյան դադարից հետո ճանապարհն արագ կմաքրվի, և բեռնատարներն էլ կկարողանան անցնել սահմանը։

Մանրամասները՝ տեսանյութում։

Անի Թամրազյան