17.05.2026 | 23:35
Հենրիխ Մխիթարյանը՝ «Ինտեր» – «Վերոնա» հանդիպման լավագույն ֆուտբոլիստ․ ՏԵՍԱՆՅՈՒԹ
Թրամփը Տոկաևին հրավիրել է միանալ Գազայի հարցով Խաղաղության խորհրդին
Քաղաքականություն
19.01.2026 | 14:34
ԱՄՆ նախագահ Դոնալդ Թրամփը Ղազախստանի նախագահ Կասիմ-Ժոմարտ Տոկաևին հրավիրել է միանալ Գազայի խաղաղության խորհրդին։ Tengrinews-ին այս մասին ասել է Ղազախստանի ղեկավարի ներկայացուցիչ Ռուսլան Ժելդիբայը, փոխանցում է ՌԲԿ-ն։
Նա նշել է, որ սխալ կլիներ թաքցնել հրավերը. Ղազախստանի նախագահն առաջիններից է, որին հրավիրել են։
«Ի պատասխան՝ պետության ղեկավարը նամակ է ուղարկել ԱՄՆ նախագահին՝ հայտնելով անկեղծ երախտագիտություն և հաստատելով իր համաձայնությունը միանալու այս նոր միավորմանը։ Նախագահը վերահաստատել է Ղազախստանի հանձնառությունը՝ իր ներդրումն ունենալու Մերձավոր Արևելքում երկարատև խաղաղության հասնելու, միջպետական վստահության ամրապնդման և համաշխարհային կայունության գործում»,- հավելել է Ժելդիբայը։
Թրամփը Գազայի Խաղաղության խորհրդի ստեղծման մասին հայտարարել էր այս տարվա հունվարի 16-ին: Այս կազմակերպության ստեղծումը ԱՄՆ նախագահի՝ Գազայում խաղաղության ծրագրի մի մասն էր՝ միջազգային ուժերի տեղակայման հետ մեկտեղ։ Նույն օրը Սպիտակ տունը հայտարարել էր խորհրդի գործադիր կոմիտեի կազմը․ այն կազմված կլինի յոթ անդամից, այդ թվում՝ ԱՄՆ պետքարտուղար Մարկո Ռուբիոյից, Թրամփի հատուկ դեսպան Սթիվ Ուիթկոֆից, ԱՄՆ նախագահի փեսայից՝ Ջարեդ Քուշներից և Մեծ Բրիտանիայի նախկին վարչապետ Թոնի Բլեերից։
Bloomberg-ը հաղորդել էր, որ ԱՄՆ նախագահի վարչակազմը խնդրում է խորհրդում մշտական տեղ զբաղեցնելու ցանկություն ունեցող երկրներին ներդնել առնվազն 1 միլիարդ դոլար: Խմբի կանոնադրության նախագծում նաև նշվում է, որ ինքը՝ Թրամփը, կլինի խորհրդի առաջին նախագահը: Նա նաև կորոշի, թե ով կմիանա կազմակերպությանը, կկարողանա հաստատել կամ մերժել կազմակերպության որոշումները, որոնք կկայացվեն մեծամասնության քվեարկությամբ:
Թարգմանությունը՝ Էմմա Չոբանյանի
