Բոլորս կրթաթոշակով էինք Լոնդոնում սովորում, միայն ես եկա ու ծառայեցի բանակում․ Ռուբինյան․ ՏԵՍԱՆՅՈՒԹ

Ազգային ժողովը քննարկում է աշխարհի 50 լավագույն համալսարաններն ավարտած և ՀՀ-ում առնվազն 3 տարի աշխատած քաղաքացիներին պարտադիր զինվորական ծառայությունից ազատելու մասին նախագիծը։

ԱԺ փոխնախագահ Ռուբեն Ռուբինյանը նշեց՝ ինքն էլ է եղել այդ 50 համալսարանների ցանկում ընդգրկված համալսարանի շրջանավարտ և իր անձնական փորձառությամբ կարող է հիմնավորել նախագիծը։

«Ես սովորել եմ Լոնդոնում 2010-2011 թվականներին և ճանաչում էի նաև իմ տարեկից, զորակոչի ենթակա տղաների, որոնք նույնպես սովորում էին այնտեղ: Ում ճանաչում էի, բոլորը կրթաթոշակով էին այնտեղ, այսինքն՝ ոչ մի հարուստի որդի չկար, համենայն դեպս, իմ ճանաչածների մեջ, ներառյալ ինձ: Արդյունքում, միակ մարդը, ով եկավ, ծառայեց, ես էի: Սա չեմ ասում, որ ես լավն եմ, մյուսները՝ վատը։

Մի մասը ընդունվել են ասպիրանտուրա, նույն, օրինակ, համալսարանում կամ այլ համալսարանում Անգլիայում, և դրա հիմքով ազատվել են: Մի մասը հետ են եկել, բայց որովհետև իրենք զորակոչային տարիքի չէին, օրինակ՝ տարիքով բարձր մարդիկ կային: Մի մասն էլ ընդհանրապես հետ չի եկել: Մարդը գնաց, Անգլիայում սովորեց, համալսարանն ավարտեց, մանավանդ եթե այնտեղ ասպիրանտուրա է ընդունվում կամ ինչ-որ այլ կերպ բանակից ազատվում, այնտեղ է արդեն իր կյանքը պատկերացնում և այդպես գնում, առաջ։

Ունենում ենք մի իրավիճակ, երբ որ մեր երկիրը, որը մասնագետների կարիք ունի, չի ունենում այդ մասնագետներին: Այսինքն՝ ով որ գնում է 50 լավագույն համալսարան, ավարտում է, իրենց մեծ մասը չի գալիս Հայաստան, ուղղակի կորցնում ենք իրենց: Այս նախագիծը հնարավորություն է տալիս, որպեսզի ոչ միայն այդ մարդկանց չկորցնենք, այլ նաև իրենց ներուժն օգտագործենք»,- նշեց նա։

Մանրամասները՝ տեսանյութում։