02.07.2026 | 16:05
Կալանավորը հացադուլի 51-րդ օրը դադարեցրել է այն․ նրա խափանման միջոց կալանքը փոխվել է
Սիրիայի բանակը անցել է Եփրատը և հարձակվել քրդերի դիրքերի վրա
Քաղաքականություն
18.01.2026 | 20:50
Սիրիայի կառավարամետ զորքերն ու ՆԳ նախարարության ուժերը քրդական աշխարհազորայիններին դուրս են մղել Եփրատ գետի աջ ափից, անցել գետը և առաջ են շարժվում երկրի հյուսիս-արևելքում գտնվող տարածքների խորքը, որոնք քրդերը վերահսկում էին երկար տարիներ։ Այդ մասին հայտնում է Սիրիայի պետական Sana գործակալությունը։
Ըստ այդ տվյալների՝ քրդական «Սիրիական դեմոկրատական ուժերի» (SDF) մարտիկները դուրս են մղվել Էթ-Թաբկա քաղաքից, որտեղ գտնվում է Էլ-Ասադ ջրամբարի պատնեշը։ Այնտեղ տեղակայված է խոշոր հիդրոէլեկտրակայան, որը կառուցվել է 1970-ականներին՝ ԽՍՀՄ աջակցությամբ։
Սիրիայի նոր իշխանություններն արդեն հայտարարել են, որ կվերագործարկեն ՀԷԿ-ը, որը երկար տարիներ գտնվում էր քրդերի վերահսկողության տակ, և էլեկտրաէներգիա կմատակարարեն տեղի բնակիչներին։
Սիրիայի նոր իշխանությունները՝ նախկին իսլամիստական խմբավորման առաջնորդ Ահմեդ աշ-Շարաայի գլխավորությամբ, մեղադրում են SDF-ին այն բանում, որ նրանց շարքերում դեռևս կան Բաշար Ասադի կողմնակիցներ, ինչպես նաև Քրդական աշխատավորական կուսակցության անդամներ։ Վերջինիս դեմ պայքարում են Թուրքիայի իշխանությունները, որոնք աջակցում են աշ-Շարաային։
Քրդերը երկար ժամանակ ԱՄՆ-ի դաշնակիցներն էին «Իսլամական պետություն» ահաբեկչական խմբավորման դեմ պայքարում։ Նրանք աշ-Շարաային մեղադրում են իսլամիստների հետ կապերի մեջ և չեն վստահում իրենց իրավունքները հարգելու նրա խոստումներին։
