29.10.2026 | 19:30
Ի՞նչ խնդիրներ արձանագրվեցին ՏԻՄ ընտրություններում․ «Անկախ դիտորդ»-ը զեկույց է հրապարակել. ՏԵՍԱՆՅՈՒԹ
Bild. Գերմանացի զինվորականները վաղաժամ և «առանց բացատրությունների» լքել են Գրենլանդիան
Քաղաքականություն
18.01.2026 | 17:17
Բունդեսվերի զինվորականների մի խումբ, որը մի քանի օր առաջ հետախուզական նպատակներով ուղարկվել էր Գրենլանդիա, անսպասելիորեն և «առանց բացատրությունների» լքում է կղզին։ Այդ մասին գրում է Bild-ը՝ հղում անելով իր թղթակցին, որը Նուուկի օդանավակայանում տեսել է զինվորներին՝ իրենց բոլոր իրերով։
Bild-ի տեղեկություններով՝ զինվորականները հրամանը ստացել են Բեռլինից հունվարի 18-ի վաղ առավոտյան։ Միաժամանակ, ինչպես նշում է պարբերականը, հետախուզական խմբի հրամանատար, ծովակալ Շտեֆան Պաուլին դեռ նախօրեին հայտնել էր, որ գործընկերների հետ փոխանակել է կարծիքներ հետագա համագործակցության շուրջ, դրա մասին զեկուցել է Բեռլինին և սպասում էր հավանության, որպեսզի դանիական կողմի հետ քննարկի հաջորդ քայլերը։ Bild-ը ընդգծում է, որ առաքելությունն ավարտվել է նախատեսված ժամկետից շուտ, իսկ նախկինում պլանավորված հանդիպումներն ու միջոցառումները շտապ չեղարկվել են։
Գրենլանդիայից զինվորականների շտապ հեռանալու պատճառը հայտնի չէ։ Bild-ը ենթադրում է, որ դա կարող է կապված լինել Դոնալդ Թրամփի սպառնալիքների հետ՝ մաքսատուրքեր սահմանելու այն ութ երկրների նկատմամբ, որոնք զինվորականներ են ուղարկել Գրենլանդիա։
Գերմանական հետախուզական խումբը Գրենլանդիա էր ժամանել ընդամենը մի քանի օր առաջ։ Հունվարի 15-ին Գերմանիայի պաշտպանության նախարարությունը հայտնել էր, որ Բունդեսվերի զինվորականները կղզի են մեկնել դանիական կողմի հրավերով՝ «Արկտիկայում Ռուսաստանի և Չինաստանի կողմից եկող սպառնալիքների ֆոնին անվտանգության ապահովման եղանակները ուսումնասիրելու» նպատակով։
Հունվարի 17-ին Դոնալդ Թրամփը հայտարարել էր, որ կսահմանի 10% մաքսատուրքեր այն ութ երկրների նկատմամբ, որոնք իրենց զինվորականներին են ուղարկել Գրենլանդիա։ Այդ երկրների թվում է նաև Գերմանիան։ Թրամփը հավելել է, որ մաքսատուրքերը կսկսեն գործել փետրվարի 1-ից, իսկ հունիսից կբարձրանան մինչև 25%, եթե չհասցվի պայմանավորվածություն ձեռք բերել Գրենլանդիան Միացյալ Նահանգների կողմից գնելու շուրջ։
Ֆրանսիայի նախագահ Էմանուել Մակրոնը այդ սպառնալիքները անվանել է «անընդունելի» և «անտեղի»։ Մեծ Բրիտանիայի վարչապետ Քիր Սթարմերը հայտարարել է, որ մաքսատուրքերի սահմանումը սխալ է և խոստացել է այդ հարցը քննարկել Թրամփի վարչակազմի հետ։ Գերմանիայի կանցլեր Ֆրիդրիխ Մերցը հույս է հայտնել, որ ՆԱՏՕ-ի շրջանակներում «կհաջողվի հասնել փոխադարձաբար ընդունելի լուծման»։
