12.11.2024 | 23:27
Գրետա Թունբերգը ժամանել է Հայաստան
Հայ և ֆրանսիացի հասարակական գործիչները դեմ են, որ Էրդողանն այցելի Ֆրանսիա
Քաղաքականություն
08.11.2018 | 14:47
Ֆրանսիայում մի խումբ մտավորականներ և հասարակական կազմակերպություններ չեն ցանկանում, որ Թուրքիայի նախագահ Ռեջեփ Թայիփ Էրդողանը մասնակցի Փարիզում նոյեմբերի 10-11-ին տեղի ունենալիք Առաջին համաշխարհային պատերազմի ավարտի 100-ամյա տարելիցի միջոցառումներին. տեղեկացնում է ermenihaber-ը:
Իրենց բողոքն արտահայտելու համար Ֆրանսիայում հայտնի մի խումբ մարդկանց ստորագրությամբ ֆրանսիական «Le Monde» թերթում հրապարակում է արվել, որտեղ դժգոհություն է արտահայտվել Էրդողանի այցի հետ կապված։
Հրապարակման մեջ հիշեցվել է Թուրքիայի ներսում տիրող լարված մթնոլորտը, ինչպիսի նաև խոսվել է Թուրքիայի դիրքորոշման մասին առանցքային մի շարք հարցերում։
Նախ և առաջ հիշատակվել է Թուրքիայի ժխտողական քաղաքականությունը Հայոց ցեղասպանության հարցում։ Քննադատության տակ է առնվել պաշտոնական Անկարայի քաղաքականությունը քրդերի և Կիպրոսի հիմնախնդրի շուրջ։ Նշվել է, որ Թուրքիան աշխարհով մեկ տարածում է հակասեմիտիստական տրամադրություններ, ինչպես նաև «անկառավարելի» ատելություն է սերմանում Իսրայել պետության նկատմամբ։ Հիշեցվել է, որ վերջին տարիներին Թուրքիայում խախտվում է մարդկանց ազատության իրավունքը և Թուրքիան դարձել է լրագրողների համար աշխարհի ամենամեծ «բանտը»։
«Թուրքիայում կա կալանավորված 55 հազար քաղաքական գործիչ։ 2 տարվա ընթացքում 150 հազար պետծառայող այլախոսության համար հեռացվել է աշխատանքից»,- ասվում է հրապարակման մեջ։
Հրապարակման տակ իրենց ստորագրություններն են դրել ֆրանսիացի և հայ մի շարք հասարակական գործիչներ, մտավորականներ։ Դրանց շարքում է նաև Ֆրանսիայում Հայոց ցեղասպանության ժխտումը քրեականացնող օրինագծի հեղինակ Վալերի Բուայեն, Ֆրանսիայում հայկական կազմակերպությունները համակարգող խորհրդի համանախագահներ Մուրադ Փափազյանն ու Արա Տոնոյանը և այլք։
Տեղեկացվում է նաև, որ Ֆրանսիայում հայկական կազմակերպությունները համակարգող խորհուրդը Էրդողանի այցի վերաբերյալ առանձին նամակ է հղել Ֆրանսիայի նախագահ Էմանուել Մակրոնին։ Դրանում խորհուրդը իր դժգոհությունն է հայտնել, որ Էրդողանը միջոցառմանը հրավիրված է։ Ասվել է, որ Թուրքիայի նախագահի ներկայությունը չի համապատասխանում «Առաջին համաշխարհային պատերազմի ավարտի 100-ամյա տարելիցին նվիրված միջոցառումների ոգուն»։
«Հուսով ենք, որ նոյեմբերի 11-ի տոնակատարությունները չեն աղտոտվի Թուրքիայի ղեկավարի այցի պատճառով»,- ասվում է նամակում։
