Քաղաքականություն
16.01.2026 | 18:53
Բաքվի նախաձեռնող խումբն Ադրբեջանում անցկացրել է «Ռասիզմ և բռնություն սիկհերի և այլ ազգային փոքրամասնությունների նկատմամբ Հնդկաստանում. ժամանակակից իրականություն» խորագրով միջազգային կոնֆերանս՝ նվիրված Հնդկաստանի կառավարության կողմից էթնիկ փոքրամասնությունների նկատմամբ, իբր, կիրառվող բռնության քաղաքականությանը:
Միջոցառումից հետո Բաքվի նախաձեռնող խումբը և Սիկհերի ֆեդերացիան ստորագրել են փաստաթուղթ-դիմում միջազգային հանրությանը՝ կոչով «համաշխարհային գործողություններ ձեռնարկել սիկհերի նկատմամբ բռնության դեմ»։
Միջոցառմանը մասնակցել են Փենջաբի մարդու իրավունքների և փոքրամասնությունների նախարար Ռամեշ Սինգհ Արորան և այլ պաշտոնյաներ, ինչպես նաև սիկհ համայնքի հայտնի ներկայացուցիչներ Կանադայից, Մեծ Բրիտանիայից և ԱՄՆ-ից, վերլուծական կենտրոնների ղեկավարներ, մարդու իրավունքների և էթնիկ փոքրամասնությունների ոլորտում աշխատող արտասահմանյան համալսարանների գիտնականներ, ինչպես նաև անհատներ, որոնք դարձել են իբրև թե Հնդկաստանի կառավարության բռնաճնշող և ռասիստական քաղաքականության անմիջական զոհեր։
Համաժողովում քննարկվել է, իբր, Հնդկաստանի կառավարության կողմից սիկհերի և այլ էթնիկ փոքրամասնությունների նկատմամբ ռասայական խտրականության, բռնության և ճնշումների համակարգված քաղաքականությունը, ինչպես նաև Հնդկաստանի կողմից Քաղաքացիական և քաղաքական իրավունքների մասին միջազգային դաշնագրի, Ռասայական խտրականության բոլոր ձևերի վերացման մասին միջազգային կոնվենցիայի և Խոշտանգումների դեմ կոնվենցիայի շրջանակներում ստանձնած պարտավորությունների կոպիտ խախտումները՝ էթնիկ փոքրամասնությունների նկատմամբ վերաբերմունքի համատեքստում։
Թարգմանությունը՝ Էմմա Չոբանյանի
