Չինաստանը և Կանադան հայտարարում են մաքսատուրքերի մեղմացման մասին Քարնիի և Սի Ցզինպինի միջև Պեկինում հանդիպումից հետո

Չինաստանի առաջնորդ Սի Ցզինպինը և Կանադայի վարչապետ Մարկ Քարնին հայտարարել են ավելի ցածր մաքսատուրքերի մասին՝ ազդարարելով իրենց երկրների հարաբերությունների վերագործարկումը Պեկինում կայացած կարևոր հանդիպումից հետո, գրում է BBC-ն։

Քարնին լրագրողներին ասել է, որ Չինաստանը, ինչպես սպասվում է, մինչև մարտի 1-ը կանադական կանոլայի յուղի համաև մաքսատուրքերը 85%-ից կնվազեցնի մինչև 15%-ի, մինչդեռ Օտտավան համաձայնել է չինական էլեկտրական մեքենաների համար հարկեր սահմանել առավել բարենպաստ՝ 6,1% դրույքաչափով։ Գործարքն առաջընթաց է տարիների լարված հարաբերություններից և փոխադարձ հարկերից հետո։

Սին ողջունել է երկրների հարաբերություններում «շրջադարձը», բայց դա նաև հաղթանակ է Քարնիի համար, որը գրեթե մեկ տասնամյակում Չինաստան այցելած առաջին կանադացի առաջնորդն է։ Նա փորձում է դիվերսիֆիկացնել կանադական առևտուրը ԱՄՆ-ից, որը իր երկրի ամենամեծ առևտրային գործընկերն է՝ ԱՄՆ նախագահ Դոնալդ Թրամփի կողմից սահմանված մաքսատուրքերի պատճառով առաջացած անորոշությունից հետո։ Գործարքը կարող է նաև ապահովել չինական ներդրումների ավելացում Կանադայում։

Ըստ հրապարակման՝ Քարնին, կարծես, ակնարկում է, որ սա Թրամփի մաքսատուրքերի արդյունք է, որոնք այժմ ԱՄՆ-ի հիմնական դաշնակիցներից մեկին մղել են դեպի իր ամենամեծ մրցակիցը։ Նա լրագրողներին ասել է, որ Կանադայի հարաբերությունները Չինաստանի հետ վերջին մեկ ամսվա ընթացքում ավելի «կանխատեսելի» են եղել, և որ ինքը Պեկինի հետ բանակցությունները համարում է «իրատեսական և հարգալից»։ Քարնին նաև հստակեցրել է, որ Օտտավան ամեն ինչի վերաբերյալ համաձայն չէ Պեկինի հետ՝ հավելելով, որ Սիի հետ իր քննարկումներում նա հստակեցրել է Կանադայի «կարմիր գծերը», այդ թվում՝ մարդու իրավունքները, ընտրություններին միջամտության վերաբերյալ մտահոգությունները և «պաշտպանիչ պատնեշների» անհրաժեշտությունը։

Վերլուծաբանները կարծում են, որ Քարնիի այցը կարող է օրինակ ծառայել աշխարհի այլ երկրների համար, որոնք նույնպես զգում են Վաշինգտոնի մաքսատուրքերի պատճառած անհարմարությունը։

Ի տարբերություն դրա՝ Սին փորձում է ցույց տալ, որ Չինաստանը կայուն գլոբալ գործընկեր է և կոչ է անում ավելի պրագմատիկ կապերի, ըստ Պեկինի՝ «բոլորի համար շահեկան»։ Եվ սա, կարծես, աշխատում է։ Հարավային Կորեայի նախագահը և Իռլանդիայի վարչապետը վերջին շաբաթներին այցելել են Պեկին։ Մեծ Բրիտանիայի վարչապետը շուտով կայցելի Չինաստան, ինչպես նաև Գերմանիայի կանցլերը։

Քարնին ասել է, որ «աշխարհը կտրուկ փոխվել է», և Կանադայի դիրքորոշումը «կձևավորի մեր ապագան առաջիկա տասնամյակների համար»։ Նա նշել է նաև, որ Կանադա-Չինաստան գործընկերությունը երկու երկրներին պատրաստում է «նոր աշխարհակարգի», ավելի ուշ հավելել, որ բազմակողմ համակարգը «քայքայվել է»։

«Չինաստան-Կանադա հարաբերությունների առողջ և կայուն զարգացումը նպաստում է համաշխարհային խաղաղությանը, կայունությանը, զարգացմանը և բարգավաճմանը»,- իր հերթին, Չինաստանի և Կանադայի պատվիրակությունների բանակցությունների մեկնարկին ասել է Սի  Ցզինպինը։

Կանադայի վերջին վարչապետը, որն այցելել է Չինաստան, Ջասթին Թրյուդոն էր, որը Սիի հետ հանդիպել էր Պեկինում 2017 թվականին։ Այդ այցը կատարվել է մինչև 2018 թվականին հարաբերությունների վատթարացումը, որը տեղի է ունեցել Կանադայի կողմից ԱՄՆ-ի խնդրանքով չինական տեխնոլոգիական հսկա Huawai-ի գլխավոր ֆինանսական տնօրեն Մեն Վանչժոուի ձերբակալությունից հետո։

Մի քանի օր անց Չինաստանը լրտեսության մեղադրանքով ձերբակալել էր Կանադայի քաղաքացիներ Մայքլ Քովրիգին և Մայքլ Սփավորին՝ քայլ, որը քննադատները համարել էին որպես Մենի ձերբակալության համար վրեժ, որը Չինաստանը հերքում էր։ Մենգը և երկու Մայքլներն ազատ են արձակվել 2021 թվականին։

Թարգմանությունը՝ Էմմա Չոբանյանի