Ինչպես է ստացվել, որ գազի կորուստները տարիների ընթացքում նվազելու փոխարեն աճել են

Ազգային ժողովի գազի և էլեկտրաէներգիայի քննիչ հանձնաժողովն այսօր քննում էր «Գազպրոմ Արմենիայի» ներկայացրած ներդրումային փաթեթը։

Ընկերության ներկայացուցիչ «Գազպրոմ Արմենիա» ՓԲԸ գլխավոր տնօրեն Հրայր Թադևոսյանը նշեց, որ սահմանին գազի վաճառքի գինը 255 դոլար է, սպառողը ստանում է 139 դրամով և ընկերության համար որևէ տարբերություն չկա, թե մանր և խոշոր սպառողներին ինչ գնով կվաճառվի գազը։

Հրայր Թադևոսյանը նաև հավելեց, որ այս պահին բանակցություններ են վարում նոր գնի  ձևավորման շուրջ և գնային առաջարկները հստակ պարզ կլինեն բանակցությունների ավարտից հետո:

Խոսելով համակարգի  կորուստների մասին՝  Թադևոսյանն ասաց, որ դրանք կազմում են 6.69 տոկոս:

«Կորուստների 2.5 տոկոսը բաշխման համակարգում է: Անհամեմատ ավելի ցածր տոկոս է, քան անգամ եվրոպական երկրներում: Չի կարող 50 տարվա մեխանիզմը նորմալ աշխատել, համակարգը շատ վատ վիճակում է, իսկ փոփոխություններ պետք է կատարեն 2025 թ․ հետո, ուստի մինչ այդ պարտավոր են պահել նույն սակագնային քաղաքականությունը»,- ասաց Հրայր Թադևոսյանը՝ նշելով, որ այդ ընթացքում պետք է հնարավորինս նվազեցվի կորուստների չափը։

Գազի և  էլեկտրաէներգիայի քննիչ հանձնաժողովի նախագահ Միքայել Մելքումյանը նիստին ներկա Հանրային ծառայությունների կարգավորման հանձնաժողովի աշխատակազմի ղեկավար Միքայել Սողոմոնյանից հետաքրքրվեց՝ ինչո՞վ է պայմանավորված այն, որ համակարգի կորուստները նախկինում 5.37 տոկոս էին, այժմ՝ 6,3։

Հարցին ի պատասխան՝ Սողոմոնյանն ասաց, որ այդ կորուստների չափը եղել է էներգետիկայի և հարկային մարմնի ներկայացրած հաշվարկի արդյունքում, ինչը չի համապատասխանել փաստացի կորուստներին, հետո, սակայն, սահմանվել է կորուստների չափման նոր կարգ։

Միքայել Մելքումյանն էլ հավելեց, որ այդ բոլոր փաստաթղթերն իրենց մոտ առկա են,  նորմատիվային կորուստը սահմանվել է 2012 թվականին, այդ հրամանը եղել է էներգետիկայի նախարարի և հարկային պետական ծառայության ղեկավարի միջև համատեղ հրաման, որի նպատակը եղել է փաստացի կորուստների օրինականացումը, իսկ հարկայինի պետը երկար ժամանակ հրաժարվում էր ստորագրել, որովհետև դա բերում էր հարկերի նվազման։