Քաղաքականություն
16.01.2026 | 15:49
Միացյալ Նահանգները կանգնած է «Իրանի քաջ ժողովրդի» կողքին, և նախագահ Դոնալդ Թրամփը «հստակեցրել է, որ բոլոր տարբերակները սեղանին են՝ կոտորածը դադարեցնելու համար», հինգշաբթի ՄԱԿ-ի Անվտանգության խորհրդում հայտարարել է ՄԱԿ-ում ԱՄՆ դեսպան Մայք Ուոլցը, գրում է Reuters-ը։
Թրամփը բազմիցս սպառնացել է միջամտել՝ ի պաշտպանություն Իրանում ցուցարարների, որտեղ, ըստ հաղորդումների, հազարավոր մարդիկ են զոհվել հոգևորական կառավարման դեմ բողոքի ցույցերը ճնշելու հետևանքով։ Սակայն հինգշաբթի Թրամփը սպասողական դիրքորոշում է ընդունել՝ ասելով, որ իրեն ասել են, թե սպանությունները թուլանում են, և որ ինքը կարծում է՝ ներկայում լայնածավալ մահապատիժների ծրագիր չկա։
«Նախագահ Թրամփը գործողության մարդ է, այլ ոչ թե անվերջ խոսելու, ինչպես մենք տեսնում ենք ՄԱԿ-ում։ Նա հստակեցրել է, որ բոլոր տարբերակները սեղանին են՝ կոտորածը դադարեցնելու համար»,- ասել է Ուոլցը Վաշինգտոնի պահանջով հրավիրված Անվտանգության խորհրդի նիստում։
Նա հերքել է Իրանի կողմից հնչող մեղադրանքները, թե բողոքի ցույցերն «արտաքին դավադրություն են՝ ռազմական գործողությունների նախանշան տալու համար»․ «Աշխարհում բոլորը պետք է իմանան, որ ռեժիմն ավելի թույլ է, քան երբևէ, հետևաբար, այս սուտը տարածում է փողոցներում գտնվող իրանցի ժողովրդի ուժի պատճառով։ Նրանք վախենում են իրենց սեփական ժողովրդից»։
ՄԱԿ-ում Իրանի դեսպանի տեղակալ Ղոլամհոսեյն Դարզին էլ ասել է, որ Իրանը չի ձգտում սրացման կամ բախման և մեղադրել է Ուոլցին «ստի, փաստերի խեղաթյուրման և միտումնավոր ապատեղեկատվական արշավի դիմելու մեջ՝ Իրանում անկարգությունները բռնության վերածելու գործում իր երկրի անմիջական մասնակցությունը թաքցնելու համար»։
«Այնուամենայնիվ, ագրեսիայի ցանկացած ակտ՝ ուղղակի կամ անուղղակի, կհանդիպի վճռական, համաչափ և օրինական պատասխանի։ Սա սպառնալիք չէ. սա իրավական իրականության հայտարարություն է»,- հայտարարել է իրանցի դիվանագետը։
ՄԱԿ-ում Ռուսաստանի դեսպան Վասիլի Նեբենզիան մեղադրել է Միացյալ Նահանգներին Անվտանգության խորհրդի նիստ հրավիրելու համար՝ «ինքնիշխան պետության ներքին գործերին բացահայտ ագրեսիան և միջամտությունը արդարացնելու» և «իրանական խնդիրը իր նախընտրած ձևով՝ անցանկալի ռեժիմը տապալելուն ուղղված հարվածների» սպառնալիքները արդարացնելու փորձի նպատակով։
«Մենք խստորեն կոչ ենք անում Վաշինգտոնի և այլ մայրաքաղաքների տաք գլուխներին՝ ուշքի գալ»,- ասել է նա։
ՄԱԿ-ի գլխավոր քարտուղար Անտոնիո Գուտերեշը կոչ է արել «առավելագույն զսպվածություն ցուցաբերել այս զգայուն պահին և զերծ մնալ ցանկացած գործողությունից, որը կարող է հանգեցնել հետագա մարդկային կորուստների կամ ավելի լայն տարածաշրջանային էսկալացիայի», փոխանցել է ՄԱԿ-ի ավագ պաշտոնյա Մարթա Պոբին։
Թարգմանությունը՝ Էմմա Չոբանյանի
