Ադրբեջանի հարձակումը կլինի ԱՄՆ-ի շահի դեմ․ ՀՀ է գալիս ամերիկյան ֆինանսը և տնտեսական շահը․ Արմինե Մարգարյան․ ՏԵՍԱՆՅՈՒԹ

«Կանայք և գլոբալ անվտանգային ճարտարապետություն» մտակենտրոնի հիմնադիր, ռազմաքաղաքական հարցերով փորձագետ Արմինե Մարգարյանը Factor TV-ի հետ զրույցում խոսել է Հայաստանի և ԱՄՆ-ի միջև TRIPP նախագծի և դրա շուրջ կոմունիկացիոն համագործակցության, տարածաշրջանային անվտանգության և ռուսական ազդեցության վերաբերյալ։ 

Արմինե Մարգարյանը նշել է, որ սա տրամաբանական շարունակությունն է երկու երկրների՝ ռազմավարական գործընկերներ դառնալու փաստի։

Փորձագետը փաստաթուղթը դիտարկում է ոչ միայն տնտեսական, այլև անվտանգային և խաղաղասիրական կոնտեքստում․ «Ես այս փաստաթուղթը դիտարկում եմ առհասարակ խաղաղության օրակարգը առաջ մղելու տրամաբանության ներքո։ Ինչո՞ւ։ Որովհետև ցանկացած փաստաթուղթ կարելի է ստորագրել, բայց եթե շարունակականություն չի ապահովվում,  փաստաթուղթը զուտ մնում է որպես փաստաթուղթ»։

Ըստ Մարգարյանի՝ ԱՄՆ-ի ներգրավվածությունը կոնկրետ ֆինանսական և տնտեսական բաղադրիչ է բերում տարածաշրջան, ինչը փոխում է անվտանգային միջավայրը․ «Միացյալ Նահանգները այստեղ բերում է իր ֆինանսը։ Իսկ եթե մենք խոսում ենք նրա մասին, որ Միացյալ Նահանգներն այստեղ իր գումարն է բերում, մենք խոսում ենք տնտեսական անվտանգության մասին։ Դու այստեղ որպես սուբյեկտ գոյություն չէիր ունենալու, դու լինելու էիր ուղղակի ինչ-որ մի տարածք, որտեղ ռուսական կողմը իր շահերի իմպլեմենտացման համար որոշակի պրոյեկտներ էր իրականացնելու»։

Խոսելով Ադրբեջանի դիրքորոշման մասին՝ Մարգարյանը նկատել է, որ Բաքուն ստիպված կլինի ընդունել խաղի կանոնները, եթե ցանկանում է մնալ միջազգային տարանցիկ ուղիների մաս․ «Ադրբեջանը չի կարող չընդունել այդ ստանդարտները, որոնք կան ամերիկյան կողմից։ Այսինքն՝ Ադրբեջանի շահերից էլ է նաև բխում, որպեսզի իր մոտ նմանատիպ կարգավորումներ տեղի ունենան»։

Նա հավելել է, որ Ադրբեջանը շատ արագ ադապտացվեց իրավիճակին՝ հասկանալով, որ հակառակ դեպքում դուրս կմնա գործընթացներից։

Մեկնաբանելով ՌԴ նախագահի աշխատակազմի կողմից Հայաստանում և այլ տարածաշրջաններում «փափուկ ուժի» կիրառման համար 165 միլիոն դոլար հատկացնելու մասին լուրերը և ռուսական քաղաքականությունը՝ Արմինե Մարգարյանը խիստ քննադատական գնահատական է հնչեցրել․

«Ռուսները մի տաղանդ ունեն, որը գերազանցել հնարավոր չէ… Իրենք կարողանում են հոյակապ կերպով իրենց դեմ տրամադրել բոլոր այն ժողովուրդներին, որոնք պատմականորեն միշտ ոչ միայն եղել են լոյալ, այլ նաև իրենց վերաբերվել են որպես ավելի քան եղբայրաբար։ Իրենք դա կարողանում են անել, դա իրենց մեծագույն տաղանդն է»։

Ըստ նրա՝ Ռուսաստանը չունի իրական «փափուկ ուժ»՝ մշակութային կամ արժեքային գրավչություն, և գործում է միայն ուժի դիրքերից․ «Իրենց մոտ ավտորիտար մենեջմենթն է դոմինանտը… Իրենք դիտարկում են, որ սա իմն է, իմ ազդեցության գոտին է, հետևաբար, դու չես որոշում, ես ինքս եմ որոշում»։

Հարցազրույցն ամբողջությամբ՝ տեսանյութում։

Ռոբերտ Անանյան