Ռուսական «Ռոստովի» կիսապաշտպան Խորեն Բայրամյանն անդրադարձել է Հայաստանի ազգային հավաքականի ելույթներին։ 33-ամյա ֆուտբոլիստն ազգային թիմում նորամուտը նշել է 2020 թվականին, մասնակցել 22 խաղի ու խփել 2 գոլ, սակայն 2023 թվականից հետո չի հրավիրվում։
«Ինչպես ցանկացած հայ ու հավաքականի նախկին ֆուտբոլիստ, ես շատ ցավոտ եմ ընդունում Հայաստանի հավաքականի գրանցած արդյունքները։ Սակայն այնտեղ կան մարդիկ, որոնք հասկանում են` ինչ պետք է անել։ Թիմը երիտասարդ է։ Վաղ թե ուշ, Հայաստանի հավաքականը պետք է «կրակի»։
Մենք տեսնում ենք Ուզբեկստանի ու Վրաստանի օրինակները։ Անվանեք դա սենսացիա կամ հրաշք, բայց դա հնարավոր է։ Եվ ես վստահ եմ, որ Հայաստանի հավաքականը ևս նման մեծ քայլ է կատարելու։ Եթե կա հնարավորություն, խաղացողները պետք է տեղափոխվեն արտասահման, փորձ հավաքեն ու առաջադիմեն»,- Բայրամյանի խոսքը մեջբերում է Championat.com-ը։
Խորեն Բայրամյանը խոսել է նաև Հայաստանի ազգային հավաքականի ավագ, Ռուսաստանի չեմպիոն «Կրասնոդարի» կիսապաշտպան Էդուարդ Սպերցյանի՝ եվրոպական ակումբ տեղափոխվելու հավանականության մասին։
«Սպերցյանը «Կրասնոդարի» խորհրդանիշներից մեկն է, նրան սիրում է ամբողջ քաղաքը։ Նա ինքն է հասել այդ ամենին ու արժանի է։ Էդուարդը 25 տարեկան է։ Կարծում եմ՝ նա ինքն է ցանկանում տեղափոխվել ուժեղ առաջնություն, սակայն առաջարկը ևս պետք է լավը լինի։ Նա Իտալիայի կամ Իսպանիայի առաջնության 9-10-րդ տեղերի թիմի խաղացող չէ։ Եթե ոչ «Միլան» կամ «Ինտեր», ապա, օրինակ, «Լացիո»։ Ես նրան համարում եմ հենց այդ մակարդակի խաղացող»,- ասել է հայ ֆուտբոլիստը։
