29.10.2026 | 18:39
«Բավարիայի» գլխավոր մարզիչը դուրս է գրվել հիվանդանոցից
Հուսով ենք տեսնել «Զանգեզուրի միջանցքի» իրականացումը, ինչպես ցանկանում է Ադրբեջանը. Ֆիդանը TRIPP-ի փաստաթղթի մասին 2 ժամ զրուցել է Բայրամովի հետ
Քաղաքականություն
15.01.2026 | 15:13
Թուրքիայի արտաքին գործերի նախարար Հաքան Ֆիդանը լրատվամիջոցների ներկայացուցիչների հետ հանդիպմանը խոսել է Թուրքիայի արտաքին քաղաքականության հիմնական առաջնահերթությունների վերաբերյալ։ Նա նաև անդրադարձել է Հայաստանի և ԱՄՆ-ի միջև ստորագրված TRIPP-ի փաստաթղթին:
«Մենք մեր նախագահին տեղեկացրել ենք այս հարցի մասին: Մեր նպատակն է՝ ավարտին հասցնել Ադրբեջանի և Հայաստանի միջև նախաստորագրված համաձայնագիրը և ապահովել Թուրքիայի ու Հայաստանի միջև հարաբերությունների կարգավորումը, որպեսզի կարողանանք հնարավորինս շուտ շարունակել մեր ուղին՝ տարածաշրջանում կայունության և բարգավաճման համար: Երեք երկրներում էլ կա քաղաքական առաջնորդության կամք: Հայաստանը մի քանի անելիք ունի: Ինչպես գիտեք՝ հունիսի սկզբին Հայաստանում ընտրություններ են։ Դա կարևոր քայլ կլինի, բայց մենք տեսնում ենք, որ պարոն Փաշինյանն այժմ առաջատար է հասարակական կարծիքի հարցումներում։ Մենք իսկապես աջակցում ենք նրա կառուցողական դերին։ Այս մոտեցումը, այս կամքը պետք է շարունակվի»,- հայտարարել է Ֆիդանը։
Նա հայտնել է, որ Ադրբեջանի արտգործնախարար Ջեյհուն Բայրամովի հետ քննարկել են TRIPP-ի շրջանակային փաստաթուղթը և կրկին, այսպես կոչված, «Զանգեզուրի միջանցք» եզրույթն է կիրառել։
«Հուսով ենք՝ կտեսնենք Զանգեզուրի միջանցքի իրականացումը, ինչպես ցանկանում է Ադրբեջանը, քանի որ այն կարևոր է Կենտրոնական միջանցքի համար: Ավելի լայն ռազմավարական պատկերում այն կարևոր է նաև տարածաշրջանային համատեքստում, մասնավորապես, Նախիջևանի միավորումը Ադրբեջանի մայրցամաքային մասին։ Իհարկե, այս միջանցքի միջոցով Թուրքիայի անմիջական բացման հարցը թյուրքական աշխարհի և Կենտրոնական Ասիայի հետ նույնպես օգտակար է: Այս ուղղությամբ ինտենսիվ աշխատանք է տարվում: Այն, ինչ մենք անվանում ենք Զանգեզուրի միջանցք, նրանք անվանում են TRIPP։ Մենք շատ ուշադիր ուսումնասիրեցինք այդ փաստաթուղթը։ Երեկ ես, ընդհանուր առմամբ, շուրջ երկու ժամ խոսեցի իմ գործընկեր Ջեյհուն Բայրամովի հետ՝ քննարկելով, թե ինչ է գրված այդ փաստաթղթում, ինչպես են նրանք դիտարկում դա, քանի որ նրանց տեսակետը կարևոր է։ Մենք նաև տեղեկացրինք նախագահին այս մասին»,- մանրամասնել է Ֆիդանը։
Թարգմանությունը՝ Էմմա Չոբանյանի
