18.08.2026 | 22:17
Հայաստանի մի շարք հասցեներում էլեկտրաէներգիայի անջատումներ կլինեն
Թրամփը ցանկացել է Իրանին «արագ և վճռական» հարված հասցնել, սակայն խորհրդականները չեն երաշխավորել, որ դրանից հետո ռեժիմը կփլուզվի. NBC News
Քաղաքականություն
15.01.2026 | 14:15
ԱՄՆ նախագահ Դոնալդ Թրամփն իր ազգային անվտանգության թիմին ասել է, որ ցանկանում է՝ ԱՄՆ-ի ցանկացած ռազմական գործողություն Իրանում «արագ և վճռական» հարված հասցնի ռեժիմին, այլ ոչ թե երկարատև պատերազմ հրահրի, հաղորդում է NBC News-ը՝ հղում անելով մի շարք աղբյուրների, փոխանցում է Meduza-ն։
«Եթե նա որոշի ինչ-որ բան անել, ապա ցանկանում է, որ դա վերջնական լինի»,- ասել է աղբյուրներից մեկը։
Սակայն Թրամփի խորհրդականները չեն կարողացել երաշխավորել, որ իրանական ռեժիմն արագ կտապալվի ԱՄՆ ռազմական հարվածից հետո: NBC News-ի երեք աղբյուրների համաձայն՝ վարչակազմը մտահոգված է, որ ԱՄՆ-ը կարող է տարածաշրջանում չունենալ բավարար ռեսուրսներ իրանական պատասխանից պաշտպանվելու համար, ինչը Թրամփի խորհրդականներն անխուսափելի են համարում:
Նման դինամիկան, NBC News-ի երկու աղբյուրների համաձայն, կարող է Թրամփին դրդել հաստատել ԱՄՆ-ի ավելի սահմանափակ ռազմական գործողություններ Իրանում, առնվազն՝ սկզբում, պահպանելով սրման տարբերակները: Աղբյուրները նշել են, որ իրավիճակն արագ զարգանում է, և հունվարի 14-ի կեսօրվա դրությամբ՝ որևէ որոշում չէր կայացվել:
Իրանում բողոքի ցույցերի բռնկումից հետո Թրամփը հայտարարել էր, որ Միացյալ Նահանգները քննարկում է մի քանի «շատ կոշտ» տարբերակներ՝ ցույցերի ցրման և ցուցարարների նկատմամբ կառավարության ճնշման դեմ պայքարելու համար։
NYT-ը հաղորդել էր, որ Թրամփին ներկայացվել են Իրանի դեմ հետագա հարվածների մի քանի տարբերակներ, այդ թվում՝ Թեհրանում ոչ ռազմական թիրախների դեմ։ Ըստ Reuters-ի՝ Եվրոպան սպասում էր ԱՄՆ-ի կողմից Իրանի դեմ հարվածի «հաջորդ 24 ժամվա ընթացքում»՝ սկսած հունվարի 14-ի երեկոյից։ Իրանը և Իրաքը փակել էին իրենց օդային տարածքը հունվարի լույս 15-ի գիշերը։
Թարգմանությունը՝ Էմմա Չոբանյանի
