10.09.2026 | 21:29
Քաղաքական խորհրդակցություններ՝ ՀՀ-ի և Լեհաստանի արտաքին գերատեսչությունների միջև
40 մլն դրամանոց էլեկտրամոբիլներ՝ Հակակոռուպցիոն կոմիտեին
14.01.2026 | 23:29
Վարչապետ Նիկոլ Փաշինյանի հանձնարարականի հիման վրա ՀՀ կառավարությունը Հակակոռուպցիոն կոմիտեին 40 մլն դրամի արժողությամբ երկու էլեկտրամոբիլ կհատկացնի՝ Պետգույքի կառավարման կոմիտեի հաշվեկշռում գտնվող։
Էլեկտրամոբիլները 2024 թվականի արտադրության VOLVO մակնիշի են, յուրաքանչյուրի արժեքը 20 մլն դրամ է։
Նախագծում նշվում է, որ մեքենաների տրամադրումը մեծապես կնպաստի ՀՀ մարզերում ձևավորված տարածքային օպերատիվ ստորաբաժանումների գործունեությանը, օպերատիվ-հետախուզական և նախաքննական գործառույթներ իրականացնող ծառայողների աշխատանքին ու հնարավորություն կընձեռի ընդլայնել նրանց բազմաշերտ գործունեության աշխարհագրությունը:
Հակակոռուպցիոն կոմիտեի մեքենաների թիվն ավելացվում է Նիկոլ Փաշինյանի մեկ այլ՝ ծառայողական ավտոմեքենաները կրճատելու հանձնարարականի ֆոնին։ Վարչապետը 2024-ին էր ենթականերին հանձնարարել կրճատել ճոխություն համարվող ծառայողական մեքենաները։ Այդ թվականին կառավարությունից լրատվամիջոցներին փոխանցել էին, որ Հակակոռուպցիոն կոմիտեի 15 մեքենաները կրճատվել են՝ հասնելով 5-ի։
Factor.am-ն ավելի վաղ տեղեկացրել էր, որ 2026 թվականի բյուջեով Հակակոռուպցիոն կոմիտեի մեքենաների թիվը 10-ն է։ Տեղեկացրել էինք նաև, որ պետական համակարգի ծառայողական մեքենաները 2026-ին 2025-ի համեմատ կկրճատվեն 7.7%-ով։ Այս տարվա բյուջեի նախագծով ծառայողական մեքենաների թիվը նախատեսվել է 639։ Ընդ որում՝ սա չի ներառում ուժային կառույցների՝ պաշտպանության, ներքին գործերի նախարարությունների, ազգային անվտանգության, արտաքին հետախուզության և պետական պահպանության ծառայությունների ծառայողական մեքենաների քանակը։
Նարեկ Կիրակոսյան
