Որևէ մեկն ուզել է Ադրբեջանից բենզին բերել, ձեռքը բռնե՞լ են.Գևորգյանը` Փաշինյանի հայտարարության մասին. ՏԵՍԱՆՅՈՒԹ

«Կառավարությունն ազատ է կոմունիկացվել բիզնեսի հետ, բայց խոսել այն մասին, որ մենք հնարավորություն չենք տվել որևէ մեկին դա (բենզին) առնել՝ ճիշտ չէ»,- այս մասին Factor.am-ի հարցին ի պատասխան ասաց Մրցակցության և սպառողների շահերի պաշտպանության հանձնաժողովի նախագահ Գեղամ Գևորգյանը՝ անդրադառնալով Ադրբեջանից բենզին ներկրող երկու ընկերություններին։

«Ոչ թե Կառավարությունն է ձեռք բերել, հետո մեկ կամ երկու հոգու առաջարկել է այլ Կառավարությունը իմացել է, որ Ադրբեջանը պատրաստակամ է վաճառել բենզին կամ դիզելային վառելիք կամ որևէ բան։ Մինչև այդ հիշում եք՝ այդ նույն ճանապարհով ցորեն էր եկել Հայաստանի Հանրապետություն։ Այսինքն՝ տնտեսվարող սուբյեկտներին ոչ թե նախապատվություն, այլ հնարավորություն է տրվել։ Ենթադրում եմ, որ բոլորն էլ իմացել են։ Հայաստանի Հանրապետությունում գործող ցանկացած տնտեսվարող սուբյեկտ կարող է իր գործընկերների միջոցով կապվել և ներմուծել բենզին։ Ու ոչ միայն բենզին կամ դիզել, ցանկացած ապրանք, որ ինքը ցանկանում է»,- բացատրեց Գևորգյանը։

Պաշտոնյան ասում է՝ տնտեսավարողների իրավուքները չեն խախտվում․ իրենք բողոքներ չեն ստացել։

«Երկու հոգու հետ են կոմունիկացվել, մնացածը, ենթադրաբար, ցանկություն չեն ունեցել»,- ասաց Գևորգյանը։

Հիշեցնենք, որ Ադրբեջանից բենզին ներկրող ընկերությունները երկուսն են, դրանցից մեկը փոխկապակցված է Խաչատուր Սուքիասյանի, մյուսը՝ Սամվել Ալեքսանյանի ընտանիքի հետ։ Ինչ սկուզբունքով են ընտրվել «Մեգա Թրեյդ» և «Շիշա ուրլդ» ընկերությունները․ Փաշինյանը պարզաբանել էր, որ Հայաստանի և Ադրբեջանի փոխվարչապետներ Մհեր Գրիգորյանի և Շահին Մուստաֆաևի հանդիպման ժամանակ Ադրբեջանի փոխվարչապետն արտահայտել է նավթամթերք վաճառելու Ադրբեջանի պատրաստակամությունը, որից հետո ՀՀ կառավարությունը տեղեկացրել է հայկական մի քանի ընկերությունների այդ հնարավորության մասին։

«ՀՀ կառավարությունը, նախնական ուսումնասիրելով դաշտը, առաջարկել է այն գործարարներին, որոնք, մեր գնահատմամբ, հակված չեն լինի դրանից քաղաքական ակցիա սարքել, ասել, օրինակ՝ «կառավարությունը մեզ ստիպում է, որ Ադրբեջանից բենզին գնենք, իսկ մենք չեն գնում և այլն», ասել ենք, որ կա նման հնարավորություն»,- ասել էր Փաշինյանը։

Մանրամասները՝ տեսանյութում։

Արփի Հակոբյան