28.07.2026 | 23:02
«Կարևոր է ակտիվացնել դիվանագիտական գործընթացը»․ Զելենսկին՝ Թրամփի հետ հանդիպման արդյունքների մասին
Ռաֆայել Հարությունյանի անունը պաշտոնապես ընդգրկվել է ԱՄՆ-ի գեղասահքի փառքի սրահում
13.01.2026 | 15:31
Ամերիկահայ անվանի մարզիչ Ռաֆայել Հարությունյանի անունն ընդգրկվել է ԱՄՆ-ի գեղասահքի փառքի սրահում։
Հանդիսավոր արարողությունը կայացել է Սենթ Լուիսում։ 2026 թվականին ԱՄՆ գեղասահքի փառքի սրահը նշում է 50-ամյակը։
Հայաստանի գեղասահքի ֆեդերացիան շնորհավորել է Ռաֆայել Հարությունյանին։
«Հայաստանի գեղասահքի համայնքը հպարտությամբ շնորհավորում է համաշխարհային գեղասահքի լեգենդար մասնագետներից մեկին՝ Ռաֆայել Հարությունյանին, Ամերիկայի Սահքի Պատվո Սրահում (U.S. Figure Skating Hall of Fame) իր անվան պաշտոնական ընդգրկման կապակցությամբ։ Այս բացառիկ խոշոր պետական և միջազգային ճանաչումը վկայում է ոչ միայն նրա անհավանական նվիրումն ու կատարած աշխատանքը, այլև նրա անմնացորդ ներդրումը կատարյալ վարպետության հասնելու ճանապարհին։
Այս մեծարման արարողությունը տեղի ունեցավ 2026 թվականի հունվարի 9-ին՝ ԱՄՆ-ում անցկացվող «Prevagen 2026» գեղասահքի առաջնության ընթացքում՝ Սենթ Լուիս քաղաքում, որտեղ Ռաֆայել Հարությունյանի երկարամյա ներդրումն ու ազդեցությունը հիշատակվեցին որպես ոգեշնչող օրինակ բոլոր սերունդների համար։
Ռաֆայել Հարությունյանը, որը մարզել է աշխարհի մի շարք լավագույն գեղասահորդների՝ ներառյալ բազմաթիվ օլիմպիական, աշխարհի և ազգային չեմպիոնների, դարձել է միջազգային սպորտի ճարտարապետներից մեկը։ Նրա աշխատանքն ու առաջնորդությունը ոչ միայն զարգացրել են տեսական գիտելիքները և տեխնիկան, այլև բարձրացրել հայկական գեղասահքի հեղինակությունը աշխարհի խոշորագույն մրցակցային հարթակներում։
Այս որոշումը Ռաֆայել Հարությունյանի՝ միջազգային գեղասահքի զարգացման գործում ունեցած նշանակալի ներդրման և հայկական սպորտի նկատմամբ նրա երկարամյա նվիրումի արժանի ճանաչում է»,- նշված է շնորհավորական ուղերձում։
ԱՄՆ-ի գեղասահքի փառքի սրահում ընդգրկվել է նաև Ռաֆայել Հարությունյանի սաներից մենասահքի կրկնակի օլիմպիական չեմպիոն Նեյթան Չենը։
Հայ մասնագետը 2000 թվականից է բնակվում ԱՄՆ-ում։ Նա երկար տարիներ մարզել է Նեյթան Չենին, որը Պեկին-2022 Օլիմպիական խաղերում ոսկե մեդալակիր է դարձել մենասահքում ու թիմային պայքարում, նաև աշխարհի եռակի չեմպիոն է։ Այժմ Ռաֆայել Հարությունյանը մարզում է նաև Իլյա Մալինին, որը 2024 ու 2025 թվականներին նվաճել է աշխարհի չեմպիոնի տիտղոսը։
