Ալիևը վերակառուցումից հետո ռազմարդյունաբերական գործարան է բացել

Ադրբեջանի նախագահ Իլհամ Ալիևը մասնակցել է Տերտերի վերակառուցված էլեկտրամեխանիկական գործարանի բացման արարողությանը: Պաշտպանական արդյունաբերության նախարար Վուգար Մուստաֆաևը նրան ներկայացրել է գործարանում ստեղծված պայմանները, գրում են ադրբեջանական լրատվամիջոցները։

Հաղորդվում է, որ գործարանը հիմնադրվել է 1976 թվականին՝ որպես Լիոնոզովսկու անվան էլեկտրամեխանիկական գործարանի Տերտերի մասնաճյուղ։ Գործարանը, որը սկսել է աշխատանքը 1977 թվականի ապրիլին, արտադրում էր էլեկտրական և հատուկ նշանակության արտադրանք։ Առաջին տարիներին այստեղ արտադրվում էին նավակների շարժիչների արագաչափեր։ Հեյդար Ալիևը 1978 թվականին ներկա է գտնվել դրա պաշտոնական բացման արարողությանը։

Իլհամ Ալիևի 2005 թվականի հրամանագրի համաձայն՝ ստեղծվել է Պաշտպանության արդյունաբերության նախարարություն, և էլեկտրամեխանիկական գործարանը դրվել է դրա իրավասության ներքո։

Հաղորդվում է, որ տարբեր տեսակի ռազմական նշանակության արտադրանք արտադրելու համար նախատեսված ձեռնարկությունը հագեցած է ժամանակակից, բարձր ճշգրտության արտադրական սարքավորումներով, որոնք ձեռք են բերվել մի շարք առաջատար երկրներից: Արտադրական գծերի նախագծումը, հոսքերի ստեղծումը և սերիական արտադրության համար հարմարեցումը իրականացվել են «Ազերսիլահ» պաշտպանական արդյունաբերության հոլդինգ ՓԲԸ-ի տեղացի մասնագետների կողմից։

Նշվում է, որ գործարանի տարածքում անցկացվել են շինարարական և վերակառուցման աշխատանքներ, շահագործման են հանձնվել նոր արտադրական շենքեր, տարածքներ և օժանդակ կառույցներ: Վերակառուցվել են գոյություն ունեցող շենքերը, ինչպես նաև ստեղծվել մասնագիտացված բալիստիկ և դիմացկունության փորձարկման համար հատուկ զորավարժարաններ՝ տեխնոլոգիական պահանջներին համապատասխան:

Իլհամ Ալիևն ավելի վաղ հայտարարել էր, որ անցյալ տարի երկրում արտադրվել է 1,4 միլիարդ մանաթի ռազմական արտադրանք, որի մի մասը փոխանցվել է Ադրբեջանի զինված ուժերին, իսկ մյուս մասը՝ արտահանվել։ Ներկայում Ադրբեջանը, ըստ նրա, ռազմական արտադրանք է արտահանում գրեթե 20 երկիր։

Թարգմանությունը՝ Էմմա Չոբանյանի