Ես ուսադիր չեմ կրում․ Պապիկյանը՝ Փաշինյանի կազմակերպած ուխտերթին մասնակցելու մասին. ՏԵՍԱՆՅՈՒԹ

«Ես չեմ անդրադառնում ինստիտուտների, որոնք առ ոչինչ են կամ գոյություն չունեն»,- այս մասին ՊՆ-ում հրավիրված ասուլիսի ժամանակ հայտարարեց պաշտպանության նախարար Սուրեն Պապիկյանը՝ անդրադառնալով «Արցախի նախագահի հրամանագրով Կարեն Շաքարյանին «Արցախի հերոս» բարձրագույն կոչումից զրկելուն»։

Թեև «Արցախի տեղեկատվական շտաբ» ֆեյսբուքյան էջում կոչումից զրկելու պատճառի մասին չէր նշվել, սակայն հիշեցնենք, որ մինչ այդ Շաքարյանը մասնակցել էր վարչապետ Նիկոլ Փաշինյանի հրավիրած ուխտերթին։

«Բոլորին պարզ է, որ դրանք առ ոչինչ ակտեր են, կամ չգիտեմ, ինչ-որ շրջանակի սփոփելու կամ իրենց գոյությունը կամ ներկայությունը ևս մեկ անգամ մատնանշելու համար է արվում, իրենց գործն է»,- նշեց նա։

Նախարարի խոսքով՝ ինքն ուխտերթին մասնակցել է որպես Հայաստանի քաղաքացի, որպես «Քաղաքացիական պայմանագիր» կուսակցության վարչության անդամ և որպես պաշտպանության նախարար։

«Ես այս պաշտոնը զբաղեցնում եմ որպես «Քաղաքացիական պայմանագիր» կուսակցության անդամ, որպես կառավարության անդամ, և բնական է, որ սրանք իրար հետ փոխկապակցված դերեր են, և այդ դերից ես ոչ միայն չեմ խուսափելու, այլև, այո՛, նշելու եմ, որ ես մասնակցել եմ որպես նաև պաշտպանության նախարար, որովհետև դրան զուգահեռ ես նաև քաղաքացի եմ, նաև քաղաքական գործիչ եմ, հարգելի գործընկերներ։ Ես ուսադիրներ չեմ կրում, ես զինվորական չեմ։ Իմ քաղաքական գործունեությունը օրենքով ոչ միայն արգելված չէ, թույլատրելի է, այլև խրախուսելի է»,-ասաց նա։

Մանրամասները՝ տեսանյութում։