16.09.2026 | 15:00
Վարսավիրանոցից են օգտվում, սրճարաններից. Ֆարմանյանը` 102-րդ ռազմաբազայի և իր նշած 15 հազար աշխատատեղի մասին․ ՏԵՍԱՆՅՈՒԹ
Ամանորի տոների ընթացքում ռուսական Նովոկուզնեցկի ծննդատանն 9 նորածին է մահացել
Քաղաքականություն
13.01.2026 | 14:19
Ռուսական Նովոկուզնեցկի թիվ 1 քաղաքային կլինիկական հիվանդանոցի ծննդատանը Նոր տարվա տոների ընթացքում մահացել է ինը նորածին, հայտնում են NGS42-ը և ՏԱՍՍ-ը՝ հղում անելով աղբյուրներին, գրում է Meduza-ն։
Մասնավորապես, հունվարի 8-ին հիվանդանոցում մահացել է երեք նորածին, իսկ հունվարի 11-ին՝ ևս երկու՝ ըստ Կուզբասի առողջապահության նախարարության NGS42-ի աղբյուրի։ Մահվան պատճառները դեռևս անհայտ են։ Հիվանդանոցի կայքում նշվում է, որ շնչառական վարակի շեմը գերազանցելու պատճառով ծննդատունը դադարեցրել է հիվանդների ընդունումը «կարանտինային միջոցառումների ամբողջ ընթացքում»։
«Հիվանդանոցում անձնակազմի պակաս չկա։ Վերաբացման ամսաթիվը կհայտարարենք ավելի ուշ»,- ասվում է հայտարարության մեջ։
NGS42-ի աղբյուրը հստակեցնում է, որ ծննդատունը փակվել է հունվարի 12-ին։
Կեմերովոյի մարզի առողջապահության նախարար Անդրեյ Տարասովը հաստատել է նորածինների մահվան լուրը՝ չնշելով մահացած փոքրիկների թիվը։
«Իրավիճակ է գրանցվել, այժմ հետաքննություն է ընթանում։ Առողջապահության նախարարության հանձնաժողովն այցելել է դեպքի վայր՝ իրավիճակը գնահատելու և լուծելու համար։ Հետաքննության ավարտից հետո մենք պաշտոնական հայտարարություն կանենք»,- նշել է նա՝ այլ մանրամասն չհայտնելով։
Քննչական կոմիտեի տարածաշրջանային վարչությունից ՏԱՍՍ-ին հայտնել են, որ հարուցվել է քրեական գործ՝ անզգուշությամբ երկու կամ ավելի անձանց մահ պատճառելու հոդվածով (ՌԴ Քրեական օրենսգրքի 109-րդ հոդվածի 3-րդ մաս): Գերատեսչության տելեգրամ ալիքում ասվում է, որ հետաքննություն է տարվում անզգուշության հոդվածով (ՌԴ Քրեական օրենսգրքի 293-րդ հոդված):
Թարգմանությունը՝ Էմմա Չոբանյանի
