Չինաստանը դեմ է «այլ երկրների ներքին գործերին միջամտելուն», Գերմանիան և Կանադան դատապարտում են բռնությունները

Չինաստանը քննադատել է Միացյալ Նահանգներին Իրանում համազգային բողոքի ցույցերի վերաբերյալ զարգացումների ֆոնին, գրում է CNN-ը։

«Մենք հետևողականորեն դեմ ենք այլ երկրների ներքին գործերին միջամտելուն»,- երկուշաբթի օրը մամուլի ասուլիսի ժամանակ հայտարարել է Չինաստանի արտաքին գործերի նախարարության խոսնակ Մաո Նինգը։

«Բոլոր երկրների ինքնիշխանությունն ու անվտանգությունը պետք է լիովին պաշտպանված լինեն միջազգային իրավունքով», – ասել է նա՝ հավելելով, որ Չինաստանը դեմ է «միջազգային հարաբերություններում ուժի կամ ուժի սպառնալիքի կիրառմանը»։ «Չինաստանը հույս ունի, որ Իրանի կառավարությունը և ժողովուրդը կկարողանան հաղթահարել առկա դժվարությունները և պահպանել ազգային կայունությունը», – նշել է նա։

Գերմանիայի կանցլեր Ֆրիդրիխ Մերցը հայտարարել է, որ Իրանի կողմից ցուցարարների դեմ «անհամաչափ և դաժան բռնության» կիրառումը «թուլության նշան է»։

«Մենք դատապարտում ենք այս բռնությունը ամենախիստ ձևով», – ասել է նա Հնդկաստան կատարած այցի ժամանակ. «Այս բռնությունը ուժի դրսևորում չէ, այլ թուլության նշան։ Այս բռնությունը պետք է դադարեցվի»։

Սոցիալական ցանցերում տարածված հայտարարության մեջ Կանադայի կառավարությունը հայտարարել է, որ «կանգնած է է Իրանի քաջ ժողովրդի կողքին» և խստորեն դատապարտել է այնտեղ ցուցարարների սպանությունը։

«Իրանական ռեժիմը պետք է դադարեցնի իր սարսափելի բռնաճնշումներն ու սպառնալիքները և հարգի իր քաղաքացիների մարդու իրավունքները», – ասվում է հայտարարության մեջ։

Թարգմանությունը՝ Էմմա Չոբանյանի