01.02.2026 | 18:27
Սաստիկ բքի և ցածր տեսանելիության պատճառով Վարդենյաց լեռնանցքը փակ է կցորդով տրանսպորտային միջոցների համար
Հայաստանյայց Առաքելական Սուրբ եկեղեցու բարենորոգմանը միացած քահանաների թիվը արդեն 16 է․ Նիկոլ Փաշինյան
Քաղաքականություն
10.01.2026 | 10:00
ՀՀ վարչապետ Նիկոլ Փաշինյանը գրառմամբ տեղեկացրել է, որ «Հայաստանյայց Առաքելական Սուրբ Եկեղեցու Բարենորոգմանը» միացած քահանաների թիվը արդեն 16 է։ Վարչապետը միաժամանակ կոչով դիմել է ժողովրդին, որպեսզի աջակցեն ու խրախուսեն Բարենորոգմանը միացած և միանալ պատրաստվող բոլոր քահանաներին։
«Հայաստանյայց Առաքելական Սուրբ Եկեղեցու Բարենորոգմանը միացած քահանաների թիվը արդեն 16 է։
Իմ եղբայրական աջակցության, զորակցության խոսքերը եւ հարգանքներիս հավաստիքը Բարենորոգմանը միացած եւ միանալ պատրաստվող բոլոր քահանաներին։
Քահանա Հայրե՛ր, նաեւ Ձեր օրհնությամբ եւ ակտիվ մասնակցությամբ Հայաստանյան Առաքելական Սուրբ Եկեղեցին կբարենորոգվի։
Նաեւ կոչ եմ անում մեր բոլոր համայնքներին եւ մարզերին, մեր սիրելի ժողովրդին՝ աջակցել, քաջալերել, խրախուսել եւ պաշտպանել Բարենորոգմանը միացած եւ միանալ պատրաստվող բոլոր քահանաներին»,- գրել է Փաշինյանը։
Հիշեցնենք, որ օրեր առաջ ՀՀ վարչապետ Նիկոլ Փաշինյանը ֆեյսբուքյան իր էջում հայտարարություն էր հրապարակել՝ Հայաստանյայց Առաքելական Սուրբ եկեղեցու բարենորոգման վերաբերյալ:
Նախօրեին Տեր Ասողիկ աբեղա Կարապետյանն էր նաև հանդես եկել հայտարարությամբ՝ շնորհակալություն հայտնելով բոլոր այն զանգերի ու գրառումների համար, որոնցով «իրենց զորակցությունն են հայտնում և անվերապահ նվիրումն ու հավատարմությունը՝ հանդեպ Մայր Աթոռը և ազգընտիր Ամենայն Հայոց Հայրապետը»:
Նշենք, որ «Հայ Առաքելական Եկեղեցու բարենորոգում» և «Հայ Եկեղեցու նորություններ» ֆեյսբուքյան էջերում եկեղեցու սպասավորները, եթե կամենում են, հայտնում են իրենց դիրքորոշումը՝ միանում են վարչապետ Փաշինյանի նախաձեռնած Եկեղեցու բարենորոգմանը, թե՝ աջակցում են կաթողիկոս Գարեգին Բ-ին։
