27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
Բաքվից պնդում են, որ Մոսկվան սեպտեմբերին դադարեցրել է AZAL-ի ինքնաթիռի վթարի գործով հիմնական անձի դեմ գործը
Քաղաքականություն
09.01.2026 | 23:08
Ռուսական ՀՕՊ համակարգերի կողմից խոցված AZAL ինքնաթիռի վթարի վերաբերյալ քրեական գործի փակումը Ռուսաստանում շարունակում է ռեկորդներ սահմանել իր անհեթեթությամբ։ Նման հրաարակում է արել ադրբեջանական իշխանամերձ Minval Politika-ն։ Լրատվականը պարզել է, որ 2025 թվականի սեպտեմբերի 2-ին Ռուսաստանի օդատիեզերական ուժերի գլխավոր հրամանատարի ղեկավարությամբ տեղի է ունեցել «հատուկ խորհրդակցություն» AZAL-ի ինքնաթիռի հետ կապված գործի վերաբերյալ։
Նիստը, որին մասնակցել է նաև 11-րդ ռազմաօդային ուժերի և ՀՕՊ բանակի հրամանատարի առաջին տեղակալ, գեներալ-մայոր Ալեքսանդր Տոլոպիլոն, սահմանափակվել է «Գորգ» ազդանշանը հայտարարելիս «համակարգման բարելավման» վերաբերյալ որոշում կայացնելով՝ միայն ապագայում նման միջադեպերի կրկնությունը կանխելու համար։
Minval Politika-ն ավելի վաղ հայտնել էր, որ Տոլոպիլոն այն զինվորականն էր, որն AZAL-ի ինքնաթիռը խոցելու հրաման է տվել։
Այժմ, ըստ Minval Politika-ի, գեներալ Տոլոպիլոյի նկատմամբ բոլոր ծառայողական հետաքննությունները դադարեցվել են։ Ադրբեջանական լրատվականը հիշեցնում է, որ անցյալ տարվա վերջին Դուշանբեում Ռուսաստանի նախագահ Վլադիմիր Պուտինը վստահեցրել էր Ադրբեջանի նախագահին, որ աղետի հետաքննությունը կավարտվի, և մեղավորները կպատժվեն։
Ըստ լրատվականի՝ Պուտինի և Ալիևի հանդիպումը տեղի է ունեցել հոկտեմբերի 9-ին, սակայն պարզվում է, որ Տոլոպիլոյի դեմ բոլոր մեղադրանքներն ավելի վաղ են հանվել։ Ըստ ադրբեջանական կողմի՝ Ռուսաստանի նախագահը, խոստումներ տալով, լիովին տեղյակ էր իրավիճակին և դիտավորյալ մոլորեցրել է Բաքվին, կամ էլ՝ Ռուսաստանի քննչական կոմիտեի ղեկավար Ալեքսանդր Բաստրիկինը դիտավորյալ ապատեղեկացրել է իր վերադասին։
Ռուսաստանի քննչական կոմիտեն հրաժարվել է մեկնաբանել քրեական գործի կարճման վերաբերյալ հարցը: Խմբագրակազմը պաշտոնական հարցում է ուղարկել՝ հետաքրքրվելով. եթե քրգործն իսկապես կարճվել է, ի՞նչ ընթացակարգային հիմքով է կայացվել այս որոշումը: Բաքվում Ռուսաստանի դեսպանատունը նույնպես հրաժարվել է մեկնաբանել այս հարցը:
Հիշեցնենք, որ Ադրբեջանի արտաքին գործերի նախարար Ջեյհուն Բայրամովը նախարարության տարեվերջյան հաշվետվության ներկայացման ժամանակ լրագրողների հարցերին ի պատասխան՝ նշե էր, որ ՌԴ-ից AZAL-ի կործանված ինքնաթիռի քրեական գործի կարճման նամակ է ստացվել:
Թարգմանությունը՝ Էմմա Չոբանյանի
