Հասարակություն
09.01.2026 | 18:26
ՀՀ-ում գործող շուրջօրյա խնամքի 2 կենտրոններ կմիավորվեն․ «Հաղթանակը» վերակազմակերպման ձևով կմիացվի «Նորք» շուրջօրյա խնամքի կենտրոնին և կվերանվանվի «Տարեց կամ հաշմանդամություն ունեցող անձանց շուրջօրյա խնամքի կենտրոն»։
Կազմակերպությունների շահառուների ընդհանուր թվաքանակը կազմում է 475, իսկ հաստիքային միավորների թվաքանակը՝ 330․1։ Նախագիծը հանրային քննարկման է ներկայացրել Աշխատանքի և սոցիալական հարցերի նախարարությունը։
«Կազակերպություններն իրականացնում են նույնաբովանդակ գործունեություն և նույնական գործառույթներ, ունեն միանման կառուցվածք, հաստիքային միավորներ և սպասարկող ռեսուրսների համանման պահանջներ։ Երկու առանձին կառավարման համակարգերի առկայությունը, սակայն, հանգեցնում է կառավարման գործընթացների կրկնության, բարդացնում է վերջիններիս համակարգումը և մեծացնում է վարչական ծախսերը։ Երկու իրավաբանական անձանց սպասարկումը պահանջում է առանձին հաշվետվողականության վարում և առաջացնում է լրացուցիչ ծախսեր՝ հատկապես հաշվապահական հաշվառման, վարչատնտեսական ապահովման, տեխնիկական աջակցության և կադրային համակարգման ուղղություններով։ Սա բերում է կրկնվող գործընթացների գոյացման և վարչական ռեսուրսների ոչ ռացիոնալ օգտագործման։
Նախագծով առաջարկվում է ներդնել կենտրոնացված կառավարման նոր մոդել, որի շրջանակներում նախատեսվում է երկու ՊՈԱԿ-ների վերակազմավորում՝ վարչական ռեսուրսների միավորման միջոցով»,-նշվում է հիմնավորման մեջ։
