09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
UFC-ի նախագահը հայտնել է՝ ինչու Արման Ծառուկյանը չի ստացել չեմպիոնական մենամարտ
09.01.2026 | 14:15
UFC-ի նախագահ Դենա Ուայթը պատմել է, թե ինչու թեթև քաշային կարգի դասակարգման առաջատար Արման Ծառուկյանը չի ստացել չեմպիոնական մենամարտ անցկացնելու հնարավորությունը։ Ըստ ամերիկացի պրոմոութերի, որոշիչ դեր է խաղացել նորզելանդացի Դեն Հուկերի դեմ մենամարտից առաջ տեղի ունեցած միջադեպը։ Հայացքների մենամարտի ժամանակ հայ մարտիկը գլխով հարվածել էր մրցակցի դեմքին։
-Շատերը կարծում են, որ Ծառուկյանն արժանի էր դառնալ չեմպիոնության հաջորդ հավակնորդը։
-Մենք գիտեինք, որ այդպես է լինելու։
-Սակայն Ծառուկյանը հայացքների մենամարտի ժամանակ գլխով հարվածել էր Հուկերի դեմքին։ Դա ազդե՞լ է ձեր որոշման վրա նրան չեմպիոնական մենամարտ չտալու հարցում։
-Այո, 100 տոկոսով։ Տարբեր բաներ են մեզ բերել այդ որոշմանը,- Spinnin Backfist-ի հետ հարցազրույցում ասել է Դենա Ուայթը։
Հիշեցնենք, որ 29-ամյա Ծառուկյանը UFC-ում նախորդ մենամարտն անցկացրել է նոյեմբերի 22-ին՝ խեղդող հնարքով հաղթելով Դեն Հուկերին։ Հայ մարտիկը խառը մենամարտերում մասնակցել է 26 հանդիպման, տարել 23 հաղթանակ ու կրել 3 պարտություն։
Հունվարի 25-ին Լոս Անջելեսում կայանալիք UFC 324 մրցաշարում UFC-ի թեթև քաշային կարգի ժամանակավոր չեմպիոնի տիտղոսի համար մենամարտելու են ամերիկացի Ջասթին Գեյջին ու բրիտանացի Փեդի Փիմբլեթը։ Գործող չեմպիոն Իլյա Տոպուրիան ժամանակավորապես հրաժարվել է տիտղոսը պաշտպանելուց։
