Խամենեին հայտարարել է, որ Թրամփը տապալվելու է, նաև քննադատել իրանցի ցուցարարներին

Իրանի գերագույն հոգևոր առաջնորդ Ալի Խամենեին զգուշացրել է ԱՄՆ նախագահ Դոնալդ Թրամփին՝ կհեռացնեն նրան՝ վկայակոչելով երկրում բողոքի ցույցերը։ Միաժամանակ, «արտասահմանյան աջակցություն ստացող ուժերին» նա մեղադրել է Իրանն ապակայունացնելու փորձերի մեջ, գրում է Iran international-ը։

«Թրամփը պետք է իմանա, որ աշխարհի բռնակալները, ինչպիսիք են փարավոնը, Նիմրուդը, Ռեզա Շահը և Մոհամմադ Ռեզան, տապալվել են իրենց ամբարտավանության գագաթնակետին։ Նա նույնպես տապալվելու է»,- ասել է Խամենեին պետական ​​հեռուստատեսությամբ հեռարձակված ելույթում։

Նա նաև շեշտել է, որ Իսլամական Հանրապետությունը չի նահանջի անկարգությունների առջև․  «Բոլորը պետք է իմանան, որ Իսլամական Հանրապետության իշխանությունը եկել է հարյուր հազարավոր պատվավոր մարդկանց արյամբ, և այն չի նահանջի դիվերսանտների առջև»։

Անդրադառնալով երկրում տեղի ունեցող բողոքի ցույցերին՝ Խամենեին ցուցարարների գործողությունները որակել է ԱՄՆ նախագահին հաճոյանալու փորձ։

«Նրանք ուզում են նրան երջանկացնել։ Եթե նա իմանար՝ ինչպես կառավարել երկիրը, կկառավարեր իր սեփական պետությունը»,- հայտարարել է Խանեմեին՝ հավելելով, որ Միացյալ Նահանգների ներսում շատ խնդիրներ կան։

Իրանի հոգևոր առաջնորդը նաև ասել է, թե «ԱՄՆ նախագահի ձեռքերը ներկված են ավելի քան 1000 իրանցիների արյունով»։ Այս հայտարարությունը վերաբերում է հունիսին Միացյալ Նահանգների կողմից Իրանի միջուկային օբյեկտների վրա իրականացված հարձակումներին։

Խամենեին իր կողմնակիցներին միասնության կոչ է արել։

«Սիրելի՛ երիտասարդներ, պահպանեք ձեր պատրաստակամությունն ու միասնությունը։ Միասնական ազգը կհաղթահարի ցանկացած թշնամու»,- հայտարարել է նա։

Թարգմանությունը՝ Էմմա Չոբանյանի