28.10.2026 | 23:23
Քննարկվել են Լուվրի և Հայաստանի պատմության թանգարանի միջև համագործակցության հեռանկարները
ԱՄՆ-ի կողմից առգրավված Bella 1 լցանավը պատկանում է ռուսական ընկերության. սեփականատերը Ղրիմից ռուս գործարար է
Քաղաքականություն
08.01.2026 | 16:31
ԱՄՆ-ի կողմից առգրավված Bella 1 (Marinera) նավթային լցանավը դեկտեմբերի վերջից պատկանում է Ռյազանի մարզում գրանցված ռուսական «Բուրևեստմարին» ընկերությանը: Այս մասին հաղորդել են Financial Times-ը և BBC-ի ռուսական ծառայությունը, գրում է Meduza-ն։
FT-ի տվյալներով՝ ընկերությունը 2025 թվականի հուլիսին հիմնադրել է գործարար Իլյա Բուգայը։
«Новая газета Европа»-ն, հղում անելով Իրավաբանական անձանց միասնական պետական գրանցամատյանին, պնդում է, որ Իլյա Բուգայը բռնակցված Ղրիմից ձեռնարկատեր է, որն այժմ բնակվում է Մոսկվայում: Աշխատանքի որոնման կայքերում կարելի է գտնել «Բուրևեստմարին»-ում մի քանի թափուր աշխատատեղ, որոնք կապված են նավագնացության հետ։
«Новая газета Европа»-ն գրում է, որ 2018 թվականից ի վեր Բուգայը նաև «Ռուսնեֆտեխիմտորգ» ընկերության գլխավոր տնօրենն է, որը զբաղվում է նավթամթերքի առևտրով: 2020 թվականին ընկերությունը վաստակել է չորս միլիարդ ռուբլի, սակայն հետագայում նրա եկամուտները զգալիորեն նվազել են, և 2024 թվականին այն վնաս է գրանցել:
Հունվարի 7-ին ԱՄՆ զինված ուժերը կալանել են երկու «ստվերային նավատորմի» լցանավ՝ «Բելլա 1»-ը (Mariner) և «Սոֆիա»-ն: Երկու նավերն էլ գտնվում են ԱՄՆ ֆինանսների նախարարության պատժամիջոցների ցանկում՝ պատժամիջոցների տակ գտնվող իրանական, վենեսուելական և ռուսական նավթ տեղափոխելու համար։
Դեկտեմբերի վերջին ԱՄՆ առափնյա պահպանությունը փորձել էր Կարիբյան ծովում ձերբակալել Պանամայի դրոշով նավարկող «Բելլա 1»-ը, որն ուղևորվում էր դեպի Վենեսուելա: Ռուսաստանի, Ուկրաինայի և Հնդկաստանի քաղաքացիներից բաղկացած անձնակազմը հրաժարվել էր կատարել ԱՄՆ զինվորական հրամանները և փոխել ուղղությունը, ինչը ստիպել էր առափնյա պահպանության ծառայությանը հետապնդել նրանց: Հետապնդումից խուսափելով՝ լցանավի անձնակազմը դրա կողքին նկարել էր Ռուսաստանի դրոշը: Դեպքից մի քանի օր անց նավը վերանվանվել էր «Mariner» և գրանցվել Ռուսաստանի ծովային նավագնացության գրանցամատյանում:
«Բելլա 1»-ի առգրավումից հետո ԱՄՆ փոխնախագահ Ջեյ Դի Վենսն այն անվանել էր «կեղծ ռուսական լցանավ»։
«Նրանք, ըստ էության, փորձում էին ներկայանալ որպես ռուսական նավթային լցանավ՝ պատժամիջոցները շրջանցելու համար»,- ասել է նա Fox News-ին տված հարցազրույցում։
Լցանավի առգրավումից հետո Ռուսաստանի տրանսպորտի նախարարությունը հայտարարություն է տարածել՝ նշելով, որ որ «Բելլա 1»-ը ստացել է Ռուսաստանի դրոշի ներքո նավարկելու ժամանակավոր թույլտվություն։ Ասվում է, թե 1982 թվականի Ծովային իրավունքի մասին ՄԱԿ-ի կոնվենցիայի համաձայն՝ «բաց ծովում գործում է նավարկության ազատության ռեժիմը, և ոչ մի պետություն իրավունք չունի ուժ կիրառել այլ պետությունների իրավասության ներքո պատշաճ կերպով գրանցված նավերի նկատմամբ»։
Թարգմանությունը՝ Էմմա Չոբանյանի
