Գարիկ Սարգսյանը ռեյտինգային ընտրակարգով առաջադրվելու է Արարատի մարզում․ ՏԵՍԱՆՅՈՒԹ

Ռեյտինգային ընտրակարգով առաջադրվելու եմ Արարատի մարզում:

Այսօր՝ նոյեմբերի 7-ին ՀՀ Ազգային ժողովում լրագրողների հետ զրույցում այս մասին ասաց Արարատի մարզպետ Գարիկ Սարգսյանը:

«Փորձելու ենք ամեն ինչ անել, որպեսզի ընտրություններն անցնեն հանգիստ, ժողովուրդը կատարի իմ կամարտահայտությունը»,- հավելեց մարզպետը:

Լրագրողի հարցին՝ ՀՀԿ-ի շունչը դեռևս կա՞ մարզում, և կարո՞ղ են հանրապետականները փորձել իր դեմ աշխատել, մարզպետը պատասխանեց. «Ինձ միշտ հետաքրքիր է՝ էդ հանրապետականի շունչ ասվածն ինչի՞ եք ասոցացնում: Եղել են մարդիկ, եղել են Հանրապետական կուսակցության հետ, այսօր ինչ-ինչ հանգամանքներում թողնում են, լքում են էդ կուսակցությունը: Բոլորն էլ մեր բնակիչներն են, թող շնչեն, թող ապրեն նոր Հայաստանում»: Անդրադառնալով Արարատի մարզում բավական բարձր հեղինակություն և վարկանիշ ունեցող անձանց ներկայությանն ու վերջին շրջանում իր հետ կապված դժգոհություններին՝ Գարիկ Սարգսյանը վստահեցրեց, որ այս ընտրությունները ցույց կտան, թե ով որքան վարկանիշ ունի:

«Եթե անցած տարի ընտրություններն անցել են համատարած կաշառքի, վախի, ռեսուրսների կիրառման պայմաններում, և մարդիկ եթե կփորձեն այս իրողություններում փորձել իրենց ուժերը, թող ապացուցեն՝ այս իրողություններում ունե՞ն այդ ռեյտինգը, թե՞ դա ուղղակի փուչիկ էր»,- հայտարարեց Գարիկ Սարգսյանը:

Մանրամասները՝ տեսանյութում։