21.02.2026 | 23:53
11-ակի օլիմպիական չեմպիոն դարձած Յոհանես Կլեբոյի պատմական հաղթանակը․ ՏԵՍԱՆՅՈՒԹ
Սպիտակ տանը հայտարարել են, որ ռուսական դրոշի տակ նավարկող կալանված լցանավի անձնակազմին սպառնում է քրեական հետապնդում
Քաղաքականություն
07.01.2026 | 23:32
Հյուսիսային Ատլանտիկայում կալանված «Բելլա 1» («Մարիներա») լցանավի անձնակազմը ենթակա է քրեական հետապնդման և անհրաժեշտության դեպքում կարող է կանգնել դատարանի առջև, հայտարարել է Սպիտակ տան մամուլի քարտուղար Քերոլայն Լիվիտը։ Այս մասին փոխանցում է Meduza.io-ն։
«Նավը կալանելու դատական օրդեր է տրվել, որը տարածվում է նաև անձնակազմի վրա։ Սա նշանակում է, որ անձնակազմի անդամները կարող են ենթարկվել դատական հետապնդման դաշնային օրենսդրության համապատասխան խախտումների համար և անհրաժեշտության դեպքում տեղափոխվել ԱՄՆ»,– ասել է Լիվիտը։
Նրա խոսքով՝ «Բելլա 1» լցանավը պատկանել է Վենեսուելայի «ստվերային նավատորմին» և տեղափոխել է ենթաօրենսդրական նավթ։ Լցանավը կալանվել է ԱՄՆ դաշնային դատարանի օրդերի հիման վրա՝ մի քանի օր տևած վերահսկումից հետո։
Նշվում է, որ դեռ դեկտեմբերի վերջին ամերիկացի զինվորականները փորձել էին ձերբակալել նավը, սակայն անձնակազմը չէր ենթարկվել առափնյա պահպանության պահանջներին, փոխել էր ընթացքը և նավի վրա պատկերել Ռուսաստանի դրոշը։ Ավելի ուշ նավը վերանվանվել է «Մարիներա» և գրանցվել Ռուսաստանի ծովային նավարկության ռեգիստրում։ Հունվարի 7-ին այն կալանվել է Հյուսիսային Ատլանտիկայում։
Լցանավը կալանելուց հետո Ռուսաստանի Տրանսպորտի նախարարությունը հայտարարել է, որ «ոչ մի պետություն իրավունք չունի ուժ կիրառել պատշաճ կերպով գրանցված նավերի նկատմամբ», իսկ ՌԴ ԱԳՆ-ն ԱՄՆ-ից պահանջել է ապահովել նավի վրա գտնվող ռուսների «մարդասիրական և արժանապատիվ վերաբերմունքը» և «չխոչընդոտել նրանց շուտափույթ վերադարձին հայրենիք»։
