08.01.2026 | 19:52
Թուրքիան պատրաստ է օգնել Սիրիայի կառավարությանը քրդական ուժերի դեմ պայքարում
Իրանը թույլ չի տա, որ թշնամական հռետորաբանությունն անպատասխան մնա․ բանակի ղեկավար
Քաղաքականություն
07.01.2026 | 15:46
Իրանի բանակի ղեկավարը հայտարարել է, որ Թեհրանն իրանցի ժողովրդի դեմ թշնամական հռետորաբանության սրացումը համարում է սպառնալիք, և անպատասխան չի թողնի դրա շարունակությունը։ Mehr-ի հաղորդմամբ՝ ԻԻՀ բանակի գլխավոր հրամանատար, գեներալ-մայոր Ամիր Հաթամին այս մասին ասել է բանակի հրամանատարաշտաբային համալսարանի 86-րդ կուրսի ուսանողների առջև ունեցած ելույթում։
Հաթամին ներկայիս համաշխարհային ժամանակաշրջանը բնութագրել է որպես «նոր համաշխարհային կարգի ձևավորման» ջանք՝ նշելով, որ նման փորձերն անվտանգության մարտահրավերներ են ստեղծել համաշխարհային, տարածաշրջանային և ազգային մակարդակներում, ինչը հանգեցրել է անկայունության և անապահովության։
Անդրադառնալով Օսմանյան կայսրության փլուզմանը և «սարսափելի սիոնիստական ռեժիմի» հաստատմանը՝ Իրանի բանակի գլխավոր հրամանատարը նշել է, որ դրանք Արևմտյան Ասիայում համաշխարհային տերությունների կողմից ձեռնարկված գործողություններից են։ Նա հիշեցրել է՝ ԱՄՆ նախկին նախագահ Ջո Բայդենն «Ալ-Աքսա փոթորիկ» գործողությունից հետո հայտարարել է, որ եթե Իսրայելի ռեժիմը գոյություն չունենար, այն պետք է ստեղծվեր։ Հաթամին ասել է, թե այս հայտարարությունը պատասխանում է նրանց, ովքեր հարցնում են, թե ինչու է Միացյալ Նահանգները շարունակում աջակցել Իսրայելի ռեժիմին՝ չնայած նրա հանցագործություններին։
Հաթամին Իրանի ժողովրդի կենսապահովման հետ կապված բողոքի ցույցերը բնութագրել է որպես ԱՄՆ նախագահի կամ Իսրայելի վարչապետի հետ կապ չունեցող՝ գովաբանելով բնակչության վարքագիծը վերջին իրադարձությունների ժամանակ։ Նա ասել է, որ ժողովուրդը իմաստուն կերպով է գործել՝ հեռու մնալով անկարգություններից և հրաժարվելով հետևել ԱՄՆ նախագահի ու Իսրայելի վարչապետի ծրագրերին։
Անդրադառնալով Իրանի ներքին գործերին արտաքին միջամտությանը՝ Հաթամին ասել է, որ Իրանի զինված ուժերի պատրաստվածությունն այսօր շատ ավելի բարձր է, քան 12-օրյա պատերազմից առաջ։ Նա զգուշացրել է, թե «թշնամու ցանկացած սխալ հաշվարկ կհանդիպի ավելի վճռական պատասխանի», և որ «ցանկացած ագրեսորի ձեռքերը կկտրվեն»։
Հաթամին նաև Իրանի դեմ ցանկացած ագրեսիայի ակտ որակել է որպես հեռահար հետևանքներ ունեցող՝ հայտարարելով, թե Իրանի բանակը կգործի ամբողջ ուժով՝ պաշտպանելու երկրի անկախությունը, տարածքային ամբողջականությունը և քաղաքական համակարգը:
Հիշեցնենք, որ ԱՄՆ նախագահ Դոնալդ Թրամփը զգուշացրել էր Իրանին, որ եթե Թեհրանը «բռնի կերպով սպանի խաղաղ ցուցարարներին», Միացյալ Նահանգները «կգա նրանց օգնության»:
Թարգմանությունը` Էմմա Չոբանյանի
