10.09.2026 | 23:04
ԿԳՄՍ նախարարը մանկավարժների հետ ոլորտային հարցեր է քննարկել
Հրդեհ Շվեյցարիայի հանգստավայրում․ նույնականացվել է ևս 16 զոհ
Քաղաքականություն
04.01.2026 | 16:19
Վալե կանտոնի ոստիկանությունը պարզել է Շվեյցարիայի Կրան-Մոնտանա լեռնադահուկային հանգստավայրում վնասվածքների հետևանքով մահացած ևս 16 անձանց ինքնությունը, որտեղ զոհվել էր մոտ 40 մարդ, իսկ 119-ը՝ տուժել։ Իրավապահ մարմինները հունվարի 4-ին, կիրակի օրը, տեղեկացրել են նոր հայտնաբերվածների մասին (նրանց ընդհանուր թիվը հասել է 24-ի), հայտնում է DW-ն։
Այդ օրը նույնականացվածների թվում են՝ 10 Շվեյցարիայի քաղաքացի, երկուսը՝ Իտալիայից, մեկը՝ Ռումիանիայից, մեկը՝ Ֆրանսիայից, մեկ Թուրքիայի քաղաքացի, ինչպես նաև մեկ անձ, ով ունի Իտալիայի քաղաքացիություն և ԱՄԷ-ի ենթակա կարգավիճակ։
Նույնականացվածներից ամենաերիտասարդը 14-ամյա աղջիկ է Շվեյցարիայից։ Բացի դրանից, զոհերի թվում են նաև երկու 15-ամյա շվեյցարուհիներ։ Զոհվածների տասը՝ 16-18 տարեկան դեռահասներ են։ Նույնականացվել են նաև երկու շվեյցարուհի՝ 24 և 22 տարեկան, ինչպես նաև երկու շվեյցարացի տղամարդ՝ 21 և 18 տարեկան։
Զոհվածների և տուժածների նույնականացման աշխատանքները շարունակվում են։
Հրդեհը բռնկվել էր Նոր տարվա գիշերը՝ Կրան-Մոնտանայի հայտնի Le Constellation բարի նկուղային հարկում, և շատ արագ տարածվել։
Տուժածների տեղափոխման համար ներգրավվել էին 10 ուղղաթիռ և 40 շտապօգնության մեքենա, փրկարարական աշխատանքներին մասնակցել է 150 բուժաշխատող և արտակարգ ծառայությունների աշխատակից։ Վալե կանտոնի մոտակա հիվանդանոցի վերակենդանացման բաժանմունքները գերաբեռնված էին։ Շատ տուժածներ ստացել էին ծանր այրվածքներ։
«Այն, ինչը պետք է դառնար ուրախության պահ, Կրան-Մոնտանայում վերածվեց ողբերգության, որը ցնցեց ամբողջ երկիրը և նրա սահմաններից դուրս մարդկանց»,- գրել է Շվեյցարիայի նախագահ Գի Պարմելենը X սոցիալական ցանցում․ «Դաշնային խորհուրդը խոր վշտով է ընդունում այս լուրը։ Նրա մտքերը զոհերի, տուժածների և նրանց ընտանիքների հետ են»։
Նախաքննական մարմնի վարկածով՝ հրդեհի պատճառ է դարձել հրավառ նյութերի անզգույշ օգտագործումը։
«Ամեն ինչ ցույց է տալիս, որ հրդեհը սկսվել է սեղանի հրավառություն-ֆոունտաններից, որոնք տեղադրված էին շամպայնի շշերի վրա և գտնվել են չափազանց մոտ առաստաղին»,-հայտարարել էր Վալե կանտոնի գլխավոր դատախազ Բեատրիս Պիյուդը՝ հունվարի 2-ին։ Նրա խոսքով՝ հրավառությունները այրել են առաստաղի երեսպատումը, և կրակը շատ արագ տարածվել է։
Le Constellation բարի սեփականատերերը՝ ֆրանսիացի ամուսիններ, հարցաքննվել են ոստիկանության կողմից, հայտնում է AFP-ն։ Նրանք ներառված են հետաքննության շրջանակում՝ ոչ դիտավորությամբ սպանության կասկածանքով։
