02.07.2026 | 15:22
Ձեր մեղավորությամբ ՀՀ-ն վերածվել է քաղկալանավայրի՝ բաց երկնքի տակ․ Մանուկյանը դիմեց ֆոն դեր Լայենին․ ՏԵՍԱՆՅՈՒԹ
Վենեսուելայի Գերագույն դատարանը Դելսի Ռոդրիգեսին նշանակել է երկրի ժամանակավոր նախագահ
Քաղաքականություն
04.01.2026 | 11:16
Վենեսուելայի փոխնախագահ Դելսի Ռոդրիգեսը պետք է կատարի պետության ղեկավարի պարտականությունները Նիկոլաս Մադուրոյի բացակայության պայմաններում, ասվում է երկրի Գերագույն դատարանի որոշման մեջ, հայտնում է Meduza-ն։
Դատարանի հայտարարության մեջ նշվում է, որ Ռոդրիգեսը «ստանձնել է նախագահի պաշտոնը՝ երկրի կառավարման շարունակականությունն ու համապարփակ պաշտպանությունն ապահովելու համար»։
Ավելի վաղ շաբաթ օրը հենց Դելսի Ռոդրիգեսը Վենեսուելայի պետական հեռուստատեսությամբ ուղերձով դիմել էր ազգին՝ հայտարարելով, որ Նիկոլաս Մադուրոն մնում է երկրի միակ օրինական նախագահը։ Ռոդրիգեսը դատապարտել է ԱՄՆ-ի «զինված ագրեսիան» Վենեսուելայի դեմ՝ հավելելով, որ գործող կառավարությունը պատրաստ է պաշտպանել երկրի ժողովրդին։
Տեսագրությունն արվել էր նրա եղբոր՝ Վենեսուելայի ազգային ժողովի ղեկավար Խորխե Ռոդրիգեսի, ներքին գործերի նախարար Դիոսդադո Կաբեյոյի և պաշտպանության նախարար Վլադիմիր Պադրինո Լոպեսի ուղեկցությամբ։
Հիշեցնենք՝ հունվարի 3-ի լույս գիշերը ԱՄՆ-ը ռազմական օպերացիա է անցկացրել Վենեսուելայում, որի ընթացքում ամերիկացի հատուկջոկատայինները ձերբակալել և երկրից դուրս են բերել նախագահ Նիկոլաս Մադուրոյին և նրա կնոջը՝ Սիլիա Ֆլորեսին։ Նրանք կանգնելու են Նյու Յորքի դատարանի առաջ՝ «նարկոտեռորիզմ», կոկաինի փոխադրում, զենքի և պայթուցիկ սարքերի պահում՝ ԱՄՆ-ի դեմ օգտագործելու նպատակով, մեղադրանքներով։ Դոնալդ Թրամփը հայտարարել է, որ ԱՄՆ-ը կղեկավարի Վենեսուելան մինչև երկրում իշխանության օրինական փոխանցումը։
