15.05.2026 | 23:20
Հուլիսի 1-ից Երևան-Բուխարեստ նոր ուղիղ չվերթ կմեկնարկի
Քաղաքացին ահազանգում է․ Yandex Eats-ից պատվերը չի հասել, բայց գումարը գանձվել է
Հասարակություն
30.12.2025 | 19:00
Factor TV-ն ահազանգ է ստացել քաղաքացուց, որ Yandex Eats հավելվածի միջոցով պատվեր է կատարել, սակայն չի ստացել ո՛չ սնունդը, ո՛չ էլ գումարի վերադարձը։
Նրա խոսքով՝ բջջային հավելվածով պատվերը կատարելիս գումարն ամբողջությամբ գանձվել է բանկային քարտից, սակայն սահմանված ժամին սնունդը չի հասել։ Փոխարենը՝ հավելվածում ստացել է ծանուցում՝ պատվերը գնահատելու առաջարկով, ինչից էլ պարզ է դարձել, որ առաքում այլևս չի լինելու։
Քաղաքացին, որ ցանկացավ անանուն մնալ՝ նշեց, որ փորձել է կապ հաստատել առաքման ծառայության հետ, սակայն նշել են, որ խնդիրն իրենց չի վերաբերում և խորհուրդ են տվել դիմել Yandex Eats-ի աջակցման ծառայություն։ Այստեղից էլ միայն պատասխանել են, որ ցավում են իրավիճակի համար, սակայն չեն կարող փոխհատուցել։
«Ամեն բան կանենք հետագայում նման դեպքեր թույլ չտալու համար։ Շնորհակալություն շատ օգտակար արձագանքի համար»,- նշել են աջակցության բաժնից։
Factor TV-ն փորձեց մեկնաբանություն ստանալ Yandex ընկերությունից, սակայն ստացավ նույն պատասխանը։
Քաղաքացին հարց է բարձրացնում՝ ո՞վ է պատասխանատու, եթե պատվերն արվել է Yandex-ի հավելվածով, գումարը գանձվել է բջջային նույն հավելվածով, բայց ապրանքը տեղ չի հասել։ Բանն այն է, որ հավելվածում բացակայում է կոնտակտային հեռախոսահամարի մասին նշում, որով հնարավոր կլիներ օպերատիվ կերպով պարզաբանում ստանալ։ Թեև պատվերի գումարը մեծ չի եղել՝ ավելի քան 5 հազար դրամ, քաղաքացին ասում է, որ իր համար խնդիրը սկզբունքային է։
«Խնդիրը գումարի մեջ չէ, այլ երևույթի։ Չի կարող լինել, որ պատվիրես, գումարդ գանձեն, պատվերը չբերեն ու վերջում էլ գրեն՝ չենք կարող փոխհատուցել»,- վրդովված ասում է քաղաքացին, որն արդեն դիմել է նաև բանկ՝ փորձելով հասկանալ՝ հնարավոր է արդյոք հետգանձում իրականացնել։
Արփի Հակոբյան
