Ադրբեջանում բենզինի, կոմունալ ծառայությունների և այլ գները բարձրացել են

Ադրբեջանում բենզինի և դիզելային վառելիքի գները բարձրացել են, իսկ դեղերի մի խմբի գները ճշգրտվել են։ Սակագնային (գնային) խորհուրդը համապատասխան որոշումներ է կայացրել, գրում են ադրբեջանական լրատվամիջոցները։

Ընդունված որոշման համաձայն՝ AI-92 բենզինի գինը բարձրացվել է 5 գյապիկով՝ 1 մանաթ 10 գյապիկից մինչև 1 մանաթ 15 գյապիկ՝ մեկ լիտրի համար։ Դիզելային վառելիքի գինը բարձրացվել է 1 մանաթից մինչև 1 մանաթ 10 գյապիկ՝ մեկ լիտրի համար։ Սակագնային խորհուրդն աճը բացատրել է «խոշոր քաղաքներում և արվարձաններում բնակչության աճով, որը վերջին տարիներին լրացուցիչ մարտահրավերներ է ստեղծել տրանսպորտային համակարգերի և շարժունակության համար»։

Նշվում է, որ 2025 թվականի սեպտեմբերին համապատասխան որոշմամբ սահմանվել է «Հասարակական տրանսպորտ» նպատակային բյուջետային ֆոնդը, որի նպատակն է «ապահովել կանոնավոր ուղևորափոխադրումների կայունությունը, ինչպես նաև բարելավել տրանսպորտային ծառայությունների որակը և անվտանգությունը»։ Ֆոնդի ձևավորման աղբյուրներից մեկը բենզինի, դիզելային վառելիքի և հեղուկ գազի յուրաքանչյուր լիտրից պահվող ճանապարհային հարկի մի մասն է։

Օրենսդրական փոփոխությունների համաձայն՝ ճանապարհային հարկը սահմանվել է 7 գյապիկ՝ մեկ լիտր վառելիքի համար։ Հիմնադրամի միջոցները նախատեսվում է օգտագործել «տրանսպորտային ծառայությունների որակի բարելավման, բոլոր ճանապարհային երթևեկության մասնակիցների անվտանգության ապահովման և հասարակական տրանսպորտի մատչելիության բարձրացման» համար։

Միևնույն ժամանակ, Սակագնային (գնային) խորհուրդը որոշել է «կարգավորել» դեղերի մի խմբի գները։ «Գնային շեմ» է հաստատվել 237 դեղամիջոցների համար, որոնք անցել են նոր պետական ​​գրանցում։ Հինգ դեղամիջոցների գնային շեմը  նույնպես իջեցվել է։

Ավելին, «կայուն մատակարարումն ապահովելու» համար, ըստ հաղորդումների, փոփոխություններ են կատարվել 53 դեղամիջոցների գների վերին սահմաններում՝ համաձայն Նախարարների կաբինետի 2015 թվականի կանոնակարգերի։

Հաղորդվում է, որ Ադրբեջանում նաև հաստատվել են էլեկտրաէներգիայի և բնական գազի ֆիքսված սակագներ: Երկու տեսակի կոմունալ ծառայությունների համար էլ սահմանվում են ֆիքսված սակագներ: Դրանց ներդրումը նախատեսված է «Էլեկտրաէներգիայի մասին» օրենքով և «Գազամատակարարման մասին» փոփոխված օրենքով, որն ուժի մեջ է մտնում 2026 թվականի հունվարի 1-ից:

Որոշման հիմնավորման մեջ նշվում է, որ ֆիքսված սակագինը ներդրվում է «սպառողների միջև ֆիքսված ծախսերի բաշխումը հավասարակշռելու համար՝ անկախ սպառման իրական մակարդակից»։ Սա վերաբերում է ենթակառուցվածքների պահպանման, ծառայությունների մատուցման և սպառման ծավալներից անկախ այլ շահագործման ծախսերին։

Հաստատված սակագների համաձայն՝ միաֆազ միացում ունեցող բնակիչների և արտագնա (ոչ բնակելի) սպառողների համար էլեկտրաէներգիայի ամսական ֆիքսված վճարը կկազմի 1 մանաթ, իսկ եռաֆազ միացում ունեցող արտագնա սպառողների համար՝ 3 մանաթ։

Կենցաղային գազային սարքավորումներ օգտագործող բնակելի և արտագնա սպառողների համար բնական գազի ֆիքսված սակագինը սահմանվում է ամսական 1 մանաթ: Արդյունաբերական գազային սարքավորումներ օգտագործող արտագնա սպառողների համար ամսական վճարը կազմում է 3 մանաթ:

Թարգմանությունը՝ Էմմա Չոբանյանի