Իրանի նախագահը կոչ է արել կառավարությանը՝ լսել ցուցարարների «օրինական պահանջները»

Իրանի նախագահը կոչ է արել երկրի կառավարությանը՝ լսել ցուցարարների «օրինական պահանջները»՝ Թեհրանում խանութպանների կողմից տնտեսական դժվարությունների դեմ մի քանի օր տևած ցույցերից հետո։ Այս մասին գրում են իրանական պետական ​​լրատվամիջոցները ,փոխանցում է France 24-ը։

Երկուշաբթի մայրաքաղաքի վաճառականները երկրորդ օրն անընդմեջ փակել էին իրենց խանութները՝ այն բանից հետո, երբ Իրանի ազգային արժույթը ոչ պաշտոնական շուկայում նոր ցածրակետի էր հասել։ Կիրակի ԱՄՆ դոլարը վաճառվում էր մոտ 1,42 միլիոն ռիալով, ինչն արժեզրկում է մեկ տարի առաջվա 820,000 ռիալի համեմատ։ Միաժամանակ, եվրոն մոտեցել է 1,7 միլիոն ռիալի։

Իրանի գլխավոր դատավոր Ղոլամհոսեյն Մոհսենի Էջեին կոչ է արել «արագ պատժել արժույթի տատանումների համար պատասխանատուներին»։

Կառավարությունը նաև հայտարարել է Կենտրոնական բանկի կառավարչի փոխարինման մասին։

«Նախագահի որոշմամբ՝ Աբդոլնասեր Հեմմատին կնշանակվի Կենտրոնական բանկի կառավարիչ»,- X-ում գրել է նախագահական աշխատակազմի հաղորդակցության պատասխանատու Մեհդի Տաբատաբային։

Հեմմատին էկոնոմիկայի և ֆինանսների նախկին նախարարն է, որը մարտին խորհրդարանի կողմից պաշտոնանկ էր արվել ռիալի կտրուկ արժեզրկման պատճառով։

Կիրակի Փեզեշքիանը խորհրդարանին ներկայացրել է հաջորդ տարվա բյուջեն՝ խոստանալով պայքարել գնաճի դեմ։ Դեկտեմբերին, պաշտոնական վիճակագրության համաձայն, տարեկան գնաճը կազմել է 52 տոկոս։ Սակայն այս ցուցանիշը դեռևս զգալիորեն ցածր է գների աճի տեմպից, մասնավորապես, առաջին անհրաժեշտության ապրանքների։

Թարգմանությունը՝ Էմմա Չոբանյանի