18.08.2026 | 23:01
Չեմ հիշում իմ աշխատանքային պարտականություններում օրենքով ինչ էր նախատեսված. Չախոյան. ՏԵՍԱՆՅՈՒԹ
32 անշարժ գույք և 312 մլն դրամ եկամուտ․ ինչ է հայտարարագրել Հայկ Մարությանը
27.12.2025 | 19:00
«Նոր ուժ» ռեֆորմիստական կուսակցության վարչության նախագահ Հայկ Մարությանի եկամուտն անցած տարի կազմել է ընդհանուր մոտ 312 մլն դրամ, այդ թվում՝ 170 հազար եվրոյի չափով վարկեր է վերցրել «Էվոկաբանկից», քաղաքացիներ Կարեն Սարգսյանից և Կարինե Խաչատրյանից, մոտ 4 մլն դրամը ֆինանսների նախարարությունից հիփոթեքային եկամտահարկի վերադարձի գումար է, 6․3 մլն դրամը հեղինակային իրավունքի գումար է «Նիկիտա Մոբայլ» ընկերությունից, 27 մլն դրամ և 59 հազար դոլար վարկեր են «ԱԱԱ պրոջեքտս» ՍՊԸ-ից, որից նաև 75․7 մլն դրամ շահաբաժին է ստացել, իսկ մնացածը անշարժ գույքի վարձակալության վճարներ են։ Ուշագրավ է, որ հիփոթեքային վարկի մայր գումար Մարությանը նշել է չեխական կրոնով՝ 2,695,170, իսկ հայկական դրամով՝ ոչ։
2024-ի տարեվերջին նա ունեցել է 32 անշարժ գույք։ Մասնավորապես, Մարությանը 2023-ին Երևանում 63 մլն դրամով առանձնատուն է գնել Երևանի Արաբկիրում, Ավստրիայում 2022-2023 թվականներին գնել է 3 բնակարան, 1 անշարժ գույքի բոլոր տվյալները պաշտպանված՝ փակ են․ ըստ երևույթին` դա գրանցված է անչափահասի անունով։ Մնացած 27 գույքը Չեխիայում է՝ 3 առանձնատուն, 10 հողամաս, 7 բնակարան, 3 ոչ բնակելի տարածք և 5 ավտոկայանատեղի։ Եվս 1 հողամաս Չեխիայում Մարությանն անցած տարի վաճառել է՝ 3,250,000 կրոնով, Նորայր Ջավուկցյանին։
Ըստ հայտարարագրի՝ Հայկ Մարությանը 2024-ին շարունակել է բնակվել Առինջի առանձնատանը, նաև օգտագործել է այլ անձի պատկանող 2022-ի արտադրության VOLKSWAGEN մակնիշի ավտոմեքենա։
2022-ին Արամ Աբաջյանից գնել է 1000 դրամ արժողությամբ բաժնետոմսեր։
Հայկ Մարությանի բանկային հաշիվներին 2024-ի տարեվերջի դրությամբ եղել է 3․2 մլն դրամ, 101,360 կրոն, 1,175 եվրո, 13․5 հազար դոլար։ Կանխիկ նա հայտարարագրել է 74 հազար կրոն, 115 հազար դոլար, 89 հազար դոլար։
Հիշեցնենք, որ Երևանի նախկին քաղաքապետ Հայկ Մարությանն օրերս վերահաստատել է 2026 թ. ԱԺ ընտրություններին իր գլխավորած «Նոր ուժ» կուսակցությամբ մասնակցելու մտադրությունը։
Գայանե Խաչատրյան
